नयाँ वर्ष २०८१ मा यसरी बनौ सडक सुरक्षाप्रति प्रतिबद्ध

विक्रम संवत २०८० साल तपाईं हाम्रो सामुबाट सधैं सधैंको लागि बिदा भएर २०८१ साल भित्रिसकेको छ । एउटा वर्ष सकिएर अर्को वर्ष आउँदै गर्दा केवल १२ महिना मात्र कटेको हुँदैन, विभिन्न आरोह अवरोहसँगै तपाईं हाम्रो जीवनमा राम्रा र नराम्रा प्रभावहरू पनि छाडेर गएको हुन्छ । कसैलाई यहीँ साल फलदायी सिद्ध हुन्छ भने कसैलाई यहीँ साल अफापसिद्ध भएको हुन्छ । 

नयाँ वर्षको पहिलो दिन मीठो खाएमा वा राम्रो ठाउँ घुमेमा वर्षभरको अवधि पनि त्यसरी नै बित्छ भन्ने मान्यताका साथ आजभोलि हामी नयाँ वर्ष मनाउने होडमा जुटिरहेका छौँ । वर्षको पहिलो एक दिनलाई मात्र मान्यता दिने अनि बाँकी दिन त्यसै–त्यसै बिताउने परिपाटीमा सुधार नगर्नेहरूका सबै नयाँ वर्षपछिका दिनहरू असफलतामा नै बित्ने निश्चित छ । वर्षको पहिलो दिन गरेको कामको सम्झना सधैँ परिरहने हुँदा पनि वर्षको पहिलो दिन मीठो खाने, राम्रो लगाउने वा शुभ कार्यको थालनी र राम्रो कामको निरन्तरता गर्नु राम्रो मानिन्छ ।

अघिल्ला धेरै वर्षदेखि हामीले नयाँ वर्ष मनाउँदै आइरहेका छौँ । नयाँ वर्षको अवसरमा अब शुभकामनाका सन्देश भन्दा पनि आफूले गर्ने नयाँ र असल कामको निरन्तरताको प्रतिबद्धता व्यक्त गर्ने नयाँ चलनको विकास गर्नु आवश्यक छ । 

भर्खरै हामीबाट बिदा भएको बर्ष २०८० मा काठमाण्डौ उपत्यकामा मात्रै सवारी दुर्घटनाबाट १ सय २६ जनाले ज्यान गुमाए । २ सय २६ जना गम्भीर र ६ हजार २ सय ४२ जना साधारण घाइते भए । यी घटनाहरू प्रति सजग, सचेत र संवेदनशील बन्दै सडक सुरक्षा प्रति सदैव प्रतिबद्ध रहने छु भनेर शपथ खाने दिनका रुपमा पनि नयाँ वर्षलाई विकास गर्न आवश्यक छ ।

त्यसैले आउनुहोस् आजको यो विशेष दिनमा दिनानुदिन बढ्दै गएको सवारी दुर्घटना र यसबाट हुने जनधनको क्षतिलाई कम गर्नका निमित्त सडक सुरक्षाका लागि निम्नानुसारका कुराहरूमा दृढ संकल्पित बनौं ।

सडक सुरक्षा प्रतिबद्धता
म तीव्र गतिमा सवारी चलाउँदिन ।
म जेव्राक्रसिङमा सदैव पैदलयात्रुलाई प्राथमिकता दिन्छु ।
म जथाभावि ओभरटेक गर्दिन । सुरक्षित अवस्थामा सडकको दाहिने साइडबाट मात्र ओभरटेक गर्छु ।
म लेन अनुशासनको पूर्ण पालना गर्छु ।
म सवारी साधन चलाउँदा मोवाइल फोनको प्रयोग गर्दिन ।
म मादक पदार्थ तथा लागु पदार्थ सेवन गरेर कहिल्यै पनि सवारी साधन चलाउँदिन ।
म अत्यावश्यक अवस्थामा बाहेक हर्नको प्रयोग गर्दिन ।
म सवारी साधनको नियमित निरीक्षण तथा मर्मत सम्भार गर्छु ।
म ट्राफिक नियम, गति सिमा, सडक संकेत र चिन्हहरूको सदैव पालना गर्छु ।

    नयाँ वर्षको उपलक्ष्यमा प्रस्तुत प्रतिबद्धतालाई यात्राका बखत ध्यान दिंदै वास्तविक कार्यान्वयनको थालनी गर्न सकियो भने तपाईं हाम्रो यात्रा अनि गन्तव्य सुरक्षित हुनेछ । तपार्इंका बाँकी यात्रा अनि गन्तव्यहरू पनि सदैव सहज र सुरक्षित रहोस् ।

  नव वर्षको पावन अवसरमा तपाईं सबै सबैमा हार्दिक शुभ कामना ।