रिभोल्ट ब्रान्डको इलेक्ट्रिक मोटरसाइकल नेपाली बजारमा, मूल्य कति ?

काठमाडौं–इलेक्ट्रिक मोटरसाइकल ब्रान्ड रिभोल्ट नेपाल भित्रिएको छ । रिभोल्टको नेपालका लागि आधिकारिक वितरक एमभी दुगड ग्रुप अन्तर्गतको विवेक अटोमोबाइलले आइतबार एक कार्यक्रम आयोजना गरी यस ब्रान्डलाई औपचारिक रुपमा सार्बजनिक गरेको हो ।

भारतमा राम्रो चर्चा कमाएको रिभोल्टका पाँच मोडल आरभी१, आरभी१ प्लस, आरभी ब्लेजएक्स, आरभी४०० बीआरजेड र आरभी४०० मोटरसाइकल अब नेपाली बजारमा समेत उपलब्ध हुनेछन् । यी मोटरसाइकलको मूल्य क्रमशः २ लाख ९९ हजार, ३ लाख ४९ हाजार, ३ लाख ९९ हजार, ४ लाख १९ हजार र ४ लाख ४९ हजार रुपैयाँ निर्धारण गरिएको छ ।

आरभी१ वाहेक अन्य सबै मोडलमा ३.२४ किलोवाट आवर क्षमताको ब्याट्री रहेको छ । आरभी१ मा भने २.२ किलोवाट आवरको ब्याट्री छ । त्यसगरी आरभी१ र आरभी१ प्लसमा २.८४ किलोवाटको पिक मोटर पावर र १.७९ किलोवाटको रेटेड मोटर पावर छ ।

अन्य तीन मोडलमा क्रमशः ४.०८, ४.१ र ३.९ किलोवाटको पिक मोटर पावर छ भने रेटेड मोटर पावर लगभग समान २.८ किलोवाट छ । यी मोटरसाइकलमा रिभोल्टले आईपी ६७ रेटेड ब्याट्री प्याक उपलब्ध गराएको छ ।

सिंगल चार्जमा १५० किलोमिटरसम्म रेन्ज दिने दाबी गरिएको रिभोल्ट मोटरसाइकललाई फास्ट चार्जरको साहयतामा ८० मिनेटमै शून्यदेखि ८० प्रतिशतसम्म चार्ज गर्न सकिन्छ ।

कम्पनीले यी मोटरसाइकलको ब्याट्रीमा ५ वर्ष अर्थात ७५ हजार किलोमिटरको वारेन्टी र चार्जरमा २ वर्षको वारेन्टी दिएको छ ।