राजन पिया नासा नेपाल बागमती प्रदेश अध्यक्षमा चयन

चितवन – नेपाल अटोमोबाइल्स एसोसिएसन (नासा नेपाल) बागमती प्रदेशको अध्यक्षमा चितवनका राजन पिया चयन भएका छन् । बागमती प्रदेशको ७ जिल्लाका प्रधिनिधिहरुको चितवनको नारायणघाटमा सम्पन्न भएको भेलाले चितवनका पियाको अध्यक्षतामा १३ सदस्यीय प्रदेश संघ चयन गरेको हो ।

बागमती प्रदेश खेलकुद विकास परिषदका सदस्य सचिव सूर्य लाल भण्डारी तथा एफआईए वर्ल्ड काउन्सिल मेम्बर गोविन्द भट्टराईको उपस्थितिमा सम्पन्न सो भेलाले प्रदेश संघको चयनसँगै वार्षिक कार्यक्रम अनुमोदन, सदस्यता वितरण तथा भरतपुर महानगरपालिकासँग सडक सुरक्षाका लागि सहकार्य गर्ने लगायतका निर्णयहरु गरेको छ ।

भेलाले काभ्रेका दिपेश योगल श्रेष्ठ, चितवनका गोपाल भट्टराई, काठमाडौँका कुन्दन श्रेष्ठ, चितवनका यस पौडेल, धादिङ्गका इन्द्र त्रिपाठी, चितवनका जनक ढकाल, सिन्धुलीका गोबर्दन राज कोजु, मकवानपुरका रञ्जन श्रेष्ठ, चितवनका देबेन्द्र अधिकारी, दोलखाका नजरमान मानन्धर, चितवनका प्रसिद्ध रिजाललाई समेत सदस्य चयन गरेको छ । त्यसै गरी रोड सेफ्टीबाट इन्जिनियर पुरन सुवेदी र महिलामा सोमा श्रेष्ठ काभ्रे र सुनिता रेग्मी चितवन चयन भएका छन् ।

मोटर र मोटरसाइक्लिङ स्पोर्ट्स, अटोमोबाइल मोबिलिटी तथा ड्राइभ टुरिजम र सडक सुरक्षाको क्षेत्रमा क्रियाशील रहने गरि ढेड दशक अगडि स्थापित नासा नेपालले हाल विभिन्न प्रदेश संघहरु गठन गरिरहेको बताएको छ ।