किन किन्नु हुँदैन ‘आर एन्ड डी’ नभएको इलेक्ट्रिक स्कुटर ?

नेपालमा इलेक्ट्रिक सवारी साधनको लोकप्रियता दिन प्रतिदिन बढ्दै गएको छ । वातावरणमैत्री र लागत बचतको कारणले गर्दा उपभोक्ताहरु पेट्रोल सवारी साधन छोडेर इलेक्ट्रिक स्कुटरप्रति आकर्षित भइरहेका छन् । तर, यस बृद्धिसँगै एक गम्भीर चुनौती पनि आएको छ—आर एन्ड डी (अनुसन्धान र विकास) नभएका स्कुटरहरूको बजारमा बढ्दो उपस्थिति ।

‘आर एन्ड डी’ के हो र किन आवश्यक छ ?
आर एन्ड डी भनेको अनुसन्धान र विकास हो, जसको माध्यमबाट कुनै पनि कम्पनीले आफ्नो उत्पादनको गुणस्तर सुधार गर्ने र नयाँ प्रविधि प्रयोग गर्ने प्रयास गर्छ । इलेक्ट्रिक स्कुटरजस्तो प्रविधिमा ‘आर एन्ड डी’ ले ठूलो भूमिका खेल्छ । यो ग्राहकको सुरक्षादेखि लिएर सवारी साधनको दिगोपन र कार्यक्षमता कायम गर्न आवश्यक छ ।

‘आर एन्ड डी’ भएका स्कुटरहरूमा ग्राहकको आवश्यकताअनुसार डिजाइन, उन्नत मोटर प्रणाली, ब्याट्रीको आयु, तथा विभिन्न सुरक्षा सावधानीमा ध्यान दिइएको हुन्छ । यस्ता स्कुटरहरू चलाउन सुरक्षित र भरपर्दो हुन्छन् ।

‘आर एन्ड डी’ नभएका स्कुटरका समस्या
नेपालमा केही आयातकर्ताहरूले ‘आर एन्ड डी’ नभएका स्कुटरहरू चीन र भारतबाट सस्तो मूल्यमा ल्याएर बिक्री गर्दै आएका छन् । भारतका केही कम्पनीहरूले चीनबाट सस्तोमा पाट्र्स ल्याएर भारतमा एसेम्बल गर्ने र ‘मेड इन इन्डिया’ लेखेर नेपालमा बेच्ने गरेको पनि पाइन्छ ।

नेपाल मै पनि कतिपय एसेम्बल गर्ने कम्पनी समेत खुलिसकेका छन् । इलेक्ट्रिक स्कुटर एसेम्बल गर्ने कुनै पनि कम्पनीको नेपालमा ‘आर एण्ड डि’ विभाग नै छैन । विभिन्न अलग अलग भेन्डरबाट अलग अलग सामान ल्याएर जुगाडमा जोडजाड गरेर स्कुटर तयार गर्ने चलन छ ।

यस्ता स्कुटरले प्रारम्भिक समयमा काम गरे पनि दीर्घकालीन प्रयोगका लागि उपयुक्त हुँदैनन् । आर एन्ड डी नभएका स्कुटरहरूले निम्न समस्याहरू निम्त्याउन सक्छन्

गुणस्तरहीन उत्पादनः यस्ता स्कुटरमा कम गुणस्तरका पाट्र्स प्रयोग गरिएको हुन्छ, जसले छोटो समयमै बिग्रने सम्भावना हुन्छ ।

सुरक्षामा खतराः आर एन्ड डी अभावका कारण यस्ता स्कुटरहरु अत्यन्तै असुरक्षित हुन सक्छन् । ब्रेकिङ सिस्टम, मोटर पावर, र ब्याट्रीको गुणस्तर तथा सावधानी कायम गर्न सक्दैनन् ।

ग्राहकका लागि सुझाव
इलेक्ट्रिक स्कुटर खरिद गर्दा ब्रान्डको विश्वसनीयता, सर्भिस सुविधा, गुणस्तरको प्रमाणपत्र, र ग्राहक समीक्षा जस्ता कुराहरूलाई प्राथमिकता दिनुपर्छ । ‘आर एन्ड डी’ मा लगानी गर्ने र बजारमा राम्रो पहिचान भएका ब्रान्डहरूबाट मात्र स्कुटर किनेर आफ्नो लगानी सुरक्षित गर्नु बुद्धिमानी हुन्छ ।