प्रतिवन्ध कायमै रहँदा पनि कसरी सार्वजनिक भयो नेपालमा पल्सर एन २५०, यस्तो छ कारण

बजाज मोटरसाइकलको नेपालका लागि आधिकारिक वितरक हंसराज हुलासचन्द एण्ड कम्पनी प्रालिले पल्सर सिरजमा सवैभन्दा ठूलो इन्जिन जडित वाइक एन २५० सार्वजनिक गर्यो । विगत ६ महिना यता पेट्रोलियम पदार्थबाट चल्ने १५० सिसी माथीका मोटरसाइकल र सवै प्रकारका प्यासेन्जर कार, जीप तथा भ्यानको आयतमा प्रतिवन्ध लाग्दै आएपनि यो मोटरसाइकल भने केही समयअघिमात्र सार्वजनिक भएको हो ।

वजाजका मोटरसाइकल नेपालमै एसेम्वल हुँदै आइरहेको र अनएसेम्वल अबस्थामा आयत हुने किटमा प्रतिवन्ध नलागेका कारण यो नयाँ मोटरसाइकल प्रतिवन्धका वावजुत पनि नेपालमा सार्वजनिक हुन सकेको हो । नेपालस्थित बिक्रेता कम्पनीले भारतबाट अनएसेम्वल अबस्थामा रहेका पार्टपूर्जा आयत गरी बजाजका सवैजसो मोडललाई नेपालमै एसेम्वल गरी बिक्री वितरण गर्दै आइरहेको छ । मोटरसाइकल सार्वजनिक भएसंगै कम्पनीले अहिले यसको वुकिङ लिइरहेको छ ।

४ लाख ९० हजार रुपैयाँ मूल्य तोकिएको यो नयाँ वाइकमा २४९ सीसी सिगंल सिलिन्डर, ४ स्ट्रोक, एसओएचसी, २ भल्भ, आयल कुल्ड, एफआई इन्जिन रहेको छ । उक्त इन्जिनले अधिकतम २४.५ पीएस पावर र २१.५ एनएम टर्क जेनेरेट गर्दछ । यसमा ५ स्पिड गियर वक्स जडान गरिएको छ ।

युवा राइडरलाई लक्षित गरी निर्माण गरिएको यसको फ्रन्ट लुक्स निकै बोल्ड र स्पोर्टी देखिन्छ । मोटरसाइकलमा दिइएको मस्कुलर सेमी डिजिटल कन्सोलमा डिजिटल ट्रिप मिटर, स्पीडोमिटर, गियर इन्डिकेटर, फ्युल वार्निङ इन्डिकेटर, फ्युल गज, क्लक, ट्रिप मिटर काउन्ट जस्ता फिचर सामेल गरिएका छन् ।

दुवै चक्कामा डिस्क व्रेक र डवल च्यान एविएस समेत दिइएको यसको ग्राउन्ड क्लिरिेयन्स १६५ एमएम रहेको छ भने ह्वीलवेस १३५१ एमएम र सिट हाइट ७९५ एमएम रहेको छ । आरामदायी यात्राको लागि मोटरसाइकलको फ्रन्टमा टेलिस्कोपीक सस्पेन्सन र पछाडि निट्रोक्स मोनोसक दिएको छ । मोटरसाइकलमा दुबैतर्फ १७ इन्चको अलोय ह्वील छ ।