देखियो प्रोटोन सागा सेडानको २०२२ मोडल, नयाँ अलोय ह्विल्स र किलेस इन्ट्री थप

मलेशियन अटो निर्माता कम्पनी प्रोटोनले आफ्नो लोकप्रिय सेडान कार सागाको नयाँ मोडल सामाजिक सञ्जालमा देखिएको छ । यसै महिनाको अन्तिम सम्ममा लन्च गर्ने तयारी भैरहेको यो कारको लुक्स र फिचर्समा केही परिमार्जन गरिएको छ ।

यो नयाँ मोडलमा प्रोटोनले मल्टि स्पोक डुअल टोन अलोय ह्विल्स थप गरेको छ । पुरानो मोडलमा दिइएको ट्विन फाइभ स्पोक डिजाइनलाई प्रतिस्थापन गर्दै १५ इन्चको यो नयाँ अलोय ह्विल्स थप गरिएको हो । जसले कारको लुक्समा नयाँ पन दिएको देख्न सकिन्छ । यसको अतिरिक्त यो नयाँ मोडलमा अन्य विभिन्न वडी किट समेत थप गरिएको छ ।

फिचर्सको कुरा गर्नुपर्दा यो कारमा किलेस इन्ट्री, नम्वर प्लेट ट्रिममा व्ल्याक फिनिसिङ र व्ल्याक साइड मिरर क्याप थप गरिएको छ । यी फिचर्सलाई टप भेरिएन्टमा मात्र दिइएको हो । यो कारको फ्रन्टलाई हाल कारोबार भैरहेको मोडलको तुलनामा पृथक देखाउनका लागि लोगो र एलइडी डे टाइम रनिङ लाइटमा समेत परिमार्जन गरिएको छ ।

पुरानै मोडलमा दिइएको १.३ लिटर पेट्रोल इन्जिनलाई निरन्तरता दिइएको यो कारले ९५ पीएस पावर र १२० एनएम टर्क जेनेरेट गर्ने जनाइएको छ । यो कार ४ स्पिड टर्क कन्भर्टर अटोमेटिक र ५ स्पिड म्यानुअल दुबै भर्सनमा आउनसक्ने अनुमान लगाइएको छ ।

प्रोटोन सागा नेपाली बजारमा समेत उपलब्ध रहँदै आएको छ । अटोमेटिक र म्यानुअल दुबै ट्रान्समिसनमा उपलब्ध यो कारको मूल्य अटोमेटिकलाई ४२ लाख ९९ हजार र म्यानुअललाई ३७ लाख ९९ हजार रुपैयाँ निर्धारण गरिएको छ । नेपाली बजारका लागि आधिकारिक वितरक जगदम्बा मोटर्स प्रालिले यो कार आयात गरी कारोबार गर्दै आइरहेको छ ।