महंगा भए आईकार भी२३ र जेइको जे६ ईभी, कुनमा कति बढ्यो ?

काठमाडौं–ईभी बजारमा निकै राम्रो चर्चा पाइरहका विद्युतीय एसयूभी आईकार भी२३ र जेइको जे६ टी थप महंगो भएका छन् । यी कारमा क्रमश ३ लाख र १ लाख रुपैयाँ मूल्य बृद्धि गरिएको हो। आईकार र जेइकोको नेपालका लागि आधिकारिक वितरक एसपीजी अटोमोबाइल्सले दुबै कारमा एकसाथ मूल्य बृद्धि गरेको हो ।

यसअघि ५० लाख ९९ हजारमा बिक्री हुँदै आएको आईकार भी२३ को मूल्य अव ५३ लाख ९९ हजार रुपैयाँ पुगेको छ भने ६८ लाख ९९ हजारमा बिक्री हुँदै आएको जेईको जे६ टीलाई ६९ लाख ९९ हजार रुपैयाँ पर्ने जनाइएको छ ।

नेपाल आएको १० महिनामा आईकार भी२३को मूल्य तीनपटक बृद्धि भइसकेको छ भने जेईको जे६ टीमा पहिलोपटक समायोजन गरिएको हो । गत भदौमा लन्च हुँदा आईकार भी२३ को मूल्य जम्मा ४७ लाख ९९ हजार रुपैयाँ निर्धारण गरिएको थियो ।

मूल्य बृद्धि नेपाल सरकारले हालै ल्याएको बजेटका कारण नभई अन्तराष्ट्रिय बजारमा अमेरिकी डलर महंगो हुनु र मध्यपूर्व द्वन्द्वले ढुवानी खर्च बढ्नु जस्ता कारणले भएको हो ।

आईकार भी२३ र जेइको जे६ टी मा क्रमश ५९.९३ किलोवाट आवर र ६५.६९ किलोवाट आवर क्षमताको ब्याट्री जडान गरिएको छ । यी कारको सीएलटीसी रेन्ज क्रमशः ४०० र ४३० किलोमिटर दाबी गरिएको छ ।