३ महिनामै २ पटक बढ्यो महिन्द्रा गाडीको मूल्य, यस्तो छ कारण

काठमाडौं–महिन्द्रा एन्ड महिन्द्राले आफ्ना प्यासेन्जर एसयूभी र इलेक्ट्रिक भेइकलको मूल्यमा वृद्धि गरेको छ । कम्पनीले आफ्ना उत्पादनहरूको मूल्यमा २.७ प्रतिशतसम्म बढाएको हो ।

उत्पादन लागत र कच्चा पदार्थको मूल्यमा भएको वृद्धिका कारण मूल्य समायोजन गर्नुपरेको कम्पनीले जनाएको छ ।

यस कार निर्माता कम्पनीले चालू वर्षमा मूल्य बढाएको यो दोस्रो पटक हो । यसअघि कम्पनीले गत अप्रिल महिनामा पनि गाडीहरूको मूल्य बढाएको थियो ।

कम्पनीले महिन्द्राको लोकप्रिय एसयूभी स्कर्पियो क्लासिकमा ३७ हजार भारु बढाएर १३ लाख ३७ हजार भारु पुर्याएको छ भने स्कर्पियो–एनको मूल्यमा भने कुनै परिवर्तन गरिएको छैन ।

त्यसैगरी, बोलेरो, थार र एक्सयूभी सिरिजमा समेत मूल्य बृद्धि गरिएको छ । सबैभन्दा ठूलो बृद्धि महिन्द्राको विद्युतीय एसयूभी एक्सईभी ९एसको वेस भेरिएन्टमा गरिएको छ । ७० हजार भारु बढेसंगै अब यो इभीको सुरुवाती मूल्य २०.६५ लाख रुपैयाँ पुगेको छ ।