नेपाली बजारमा उपलब्ध प्रिमियम इलेक्ट्रिक कार, मूल्य २ करोड ३० लाखसम्म

काठमाडौं– नेपाली अटो बजारमा पछिल्लो समय महंगा र लक्जरी व्रान्डका इलेक्ट्रिक कार भित्रिन थालेका छन् । विश्व प्रख्यात जर्मन लक्जरी ब्रान्ड विएमडब्लू र औडीले केही समय अघि आफ्नो चर्चित इलेक्ट्रिक कारलाई लन्च गरेपछि नेपाली ईभी बजार विस्तारै महंगा र प्रिमियम ब्रान्डमा सिफ्ट हुँदै गएको संकेत गरेको हो । यसअघि प्रख्यात अमेरिकन ब्रान्ड टेस्लाका इलेक्ट्रिक कार बिक्री हुँदै आएको थियो ।

प्रिमियम ईभी सेग्मेन्टमा सवैभन्दा पहिले नेपाल आएको टेस्लाले हाल मोडल थ्री र मोडल वाई बिक्री गर्दै आएको छ । एरेट इन्टरनेश्नलले आयत गरी बिक्री गर्दै आएको टेस्ला विश्व बजारमै सर्बाधिक बिक्री हुने प्रिमियम ब्रान्डको इलेक्ट्रिक कार हो ।

कम्पनीले मोडल–३ लाई १ करोड ३० लाखमा बिक्री गर्दै आएको छ । यसैगरी अर्को मोडल वाईलाई कम्पनीले स्ट्यान्डर्ड र लङ रेन्जमा आयत गरी बिक्री गर्दै आएको छ । जसको मूल्य क्रमशः १ कारोड ८९ लाख र १ करोड ९९ लाख निर्धारण गरिएको छ ।

करोड माथी मूल्यमा बिक्री हुँदै आएको अर्को प्रिमियम इभी हुन्डाई आयोनिक–५ लाई आधिकारिक बिक्रेता लक्ष्मी इन्टरकन्टिनेन्टल प्रालिले १ करोड २ लाख ९६ हजार रुपैयाँमा बिक्री गर्दै आएको छ ।

नेपाली इलेक्ट्रिक कार बजारमा सवैभन्दा महंगो ईभीको पहिचान भने हालसालै नेपाल भित्रिएको विएमडव्लू आईएक्स–३ ले वनाएको छ । सो कारलाई आधिकारिक विक्रेता लक्ष्मी प्रिमियमले २ करोड २९ लाख ९६ हजार रुपैयाँमा बिक्री थालेको हो । ८० किलोवाट आवर क्षमताको लिथियम आयोन ब्याट्री, २१० किलोवाट क्षमताको रियर ह्वील ड्राइभ मोटर यसमा पाउन सकिन्छ । कम्पनीले यसमा ५.० ई–ड्राइभ टेक्नोलोजी प्रयोग गरेको छ । यसको अधिकतम पावर २८५ पीएस र टर्क ४०० न्यूटन मिटर रहेको छ ।

पछिल्लो समय नेपाल आएको जर्मन अटो ब्रान्ड अउडीको क्यू फोर ई–ट्रोनको मूल्य १ करोड ४५ लाख र १ करोड ५० लाख निर्धारण गरिएको छ । ई–ट्रोन ३५ र ई–ट्रोन ३५ स्पोर्टब्याक गरी कुल दुई भेरिएन्टमा उपलब्ध यी कारलाई काइरोस इन्टरनेश्नलले नेपाल भित्राएको हो ।

यी विद्युतीय कारमा ५५ किलोवाट आवरको लिथियम आयोन ब्याट्री प्याक रहेको छ । सो कारमा रहेको मोटरको पिक पावर १२५ किलोवाट रहेको छ । यसको ग्राउन्ड क्लियरेन्स १८० एमएम छ । अउडीको यो कारले एक पटकको फुल चार्जमा ३४९ किलोमिटर रेन्ज दिने डब्लुएलटीपीले प्रमाणित गरेको छ ।