प्रभागले ल्यायो सैन्य प्रयोजनमा प्रयोग हुने इभी, व्याट्रीको आयू १० लाख किलोमिटर माथी

भारतको स्टार्टअप कम्पनी प्रभागले सैन्य प्रयोजनमा प्रयोग हुने नयाँ इभी भीर सार्वजनिक गरेको छ । भारतको ग्रेटर नोयडामा आजबाट शुरु भएको अटो एक्सपोमा उसले यो नयाँ इभीलाई प्रदर्शनीमा राखेको छ । प्रभागले यो आर्म इभीलाई २ महिनाअघि सार्वजनिक गरेको डेफी इभीमा आधारित भई निर्माण गरेको हो । यसमा प्रयोग भएको व्याट्रीले १० लाख किलोमिटर गुड्दासम्म काम गर्ने जनाइएको छ ।

भीरमा ९०.९ किलोवाट आवरको ठूलो व्याट्री जडान गरिएको छ । जसलाई एकपटक फूल चार्ज गर्दा ५०० किलोमिटर माथी रेन्ज प्राप्त गर्न सकिने कम्पनीको दावी छ । यसमा जडान गरिएको मोटरले ४०८ एचपी पावर र ६२० एनएम टर्क जेनेरेट गर्दछ । ४.९ सेकेन्डमै शून्यदेखी १०० किलोमिटरसम्मको गति पकड्न सक्ने दावी गरिएको यसलाई २१० किलोमिटर प्रतिघन्टाको उच्चतम गतीमा हाँक्न सकिन्छ । यसको व्याट्रीलाई २५ मिनेट भित्रमा शून्यदेखी ८० प्रतिशतसम्म चार्ज गर्न सकिन्छ ।

सैन्य प्रयोजनमा प्रयोग हुने कारण यसको वडी निकै वलियो र मजवुत तवरले निर्माण गरिएको छ । क्याविन भित्र अत्यावश्यक वाहेक अन्य फिचर दिइएको छैन । कम्पनीका अनुसार यसको इन्टेरियर र क्याविनलाई सैनिकले आफ्नो आवश्यकता अनुसार कस्टमाइज गर्न सक्नेछन् ।

सेफ्टिको मामलमा भने यो इभी एकदमै मजवुत रहेको दावी गरिएको छ । यसमा ६ वटा एयर व्याग, टायर प्रेसर मोनिटरिङ, सिस्टम, १२ अल्ट्रा सोनिक सेन्सर सहितको ३६० डिग्रीको क्यामेरा, एडप्टिभ एलइडी हेडलाइट र ७७ जिगाहर्जको राडर जडान गरिएको छ ।