ओलाले इलेक्ट्रिक बाइक लन्च गर्ने तयारी गर्दै

ओला इलेक्ट्रिकले चाँडै नै नयाँ इलेक्ट्रिक बाइक लन्च गर्ने सम्भावना छ । कम्पनीका प्रमुख कार्यकारी अधिकृत भाविश अग्रवालले सामाजिक सञ्जालमार्फत यसको जानकारी दिएका हुन् ।

ओलाका संस्थापक तथा सीईओ भाविश अग्रवालले ट्वीटरमा बजाज–ट्रायम्फ र हिरो मोटोकर्प–हार्ले डेभिडसन बीचको सम्झौतापछि आएका नयाँ बाइकको नाम नलिइकन यसको वारेमा उल्लेख गरेका छन् ।

अग्रवालले भारतीय कम्पनीलाई पुरानो पश्चिमी आईसीई मोटरसाइकल ब्रान्डका बाइकसँग सम्झौता गर्नु नपर्ने र पुरै विश्वका लागि भारतमै ईभी र मेक इन इन्डियाको साथ मोटरसाइकलको भविष्य सिर्जना गर्ने आश्वासन दिएका छन् ।

रिपोर्टका अनुसार कम्पनीले नयाँ इलेक्ट्रिक बाइकसँगै नयाँ स्कुटर पनि ल्याउन सक्नेछ । यसको जानकारी पनि भाविशले केही समयअघि सामाजिक सञ्जालमा दिएका थिए । भाविशले शेयर गरेको फोटो अनुसार नयाँ स्कुटरमा एलईडी लाइट, एलईडी डीआरएल पनि दिइने अनुमान गर्न सकिन्छ । साथै यसमा केही नयाँ फिचर पनि थप्न सकिन्छ ।

हाल कम्पनीले ३ वटा स्कुटर बिक्री गरिरहेको छ । जसमा ओला एसवान एयर, एसवान र एसवान प्रो समावेश छन् । यसको मूलय १ लाख १० हजार भारुबाट सुरु हुन्छ र एसवान प्रोको मूल्य १ लाख ४० हजारसम्म जान्छ ।