ओलाद्वारा एस१ एक्स रेन्जका नयाँ इलेक्ट्रिक स्कुटर लन्च

ओला इलेक्ट्रिकले भारतमा एस१ एक्स रेन्जका इलेक्ट्रिक स्क्ुटर लन्च गरेको छ । सो स्कुटर एस१ एक्स अन्तर्गत २ किलोवाट र ३ किलोवाट तथा एस१ एक्स प्लस गरी तीन भेरिएन्टमा सार्वजनिक गरिएको हो ।

यो भन्दा पहिले देखि नै उपलब्ध ओला एस१ प्रो मोडल पनि अपडेट गरिएको छ र यसलाई नयाँ जेनेरेसन प्लेटफर्मका साथ ल्याइएको छ । त्यसैगरी अर्को एस१ एयर समेत बजारमा उपलब्ध छ । यस अनुसार अब ओलाका सबै गरी ५ भेरिएन्ट उपलब्ध हुनेछन् ।

हाल लन्च गरिएको २ किलोवाट आवरको एस१ एक्सको मूल्य ७९ हजार ९९९ र ३ किलोवाट आवरको एस१ एक्सको मूल्य ८९ हजार ९९९, एस१ एक्स प्लसको मूल्य ९९ हजार ९९९ तथा एस१ प्रोको मूल्य १ लाख ४७ हजार ४९९ भारु तोकिएको छ । आगामी अगस्त २१ सम्मका लागि सो मूल्य कायम गरिएको हो । त्यसपछि १० हजार भारु बढ्ने छ ।

नयाँ प्लेटफर्मको साथमा एस१ प्रोमा ११ किलोवाटको मोटर दिइएको छ । अहिले यसको रेन्ज १८१ किलोमिटरबाट १९५ किलोमिटर पुगेको छ । यसको टप स्पिड अहिले १२० किमी प्रतिघन्टा छ र यसले २.२ सेकेन्डमा ०–४० किमी प्रतिघन्टा दुरी तय गर्छ।

ओला एस१ एक्स प्लसले ६ किलोवाटको पावर जेनेरेट गर्छ। यो इलेक्ट्रिक स्कुटरले १५१ किलोमिटरको रेन्ज प्रदान गर्ने र ९० किलोमिटर प्रति घन्टाको टप स्पिड रहेको कम्पनीको दाबी छ । यसले मात्र ३.३ सेकेन्डमा ०–४० किमी प्रतिघण्टाको गति बढाउँछ।

ओला एस१ एक्स प्लस ४ किलोवाट आवर ब्याट्रीको साथ आउँछ, जबकि एस१ एक्समा २ र ३ किलोवाट आवरको ब्याट्री अप्सन छ । योसँगै ओला इलेक्ट्रिकले नयाँ प्लेटफर्म लन्च गरेको छ र कम्पनीको एस१ एयर पनि यही प्लेटफर्ममा निर्माण गरिएको छ ।

ओला इलेक्ट्रिकले नयाँ प्लेटफर्मले कार्यसम्पादनमा ३० प्रतिशत सुधार, थर्मल कार्यसम्पादनमा २५ प्रतिशत सुधार र लागतमा २५ प्रतिशत कमी ल्याएको दाबी गरेको छ । यसमा ११ प्रतिशत कम पार्ट्स, ७ प्रतिशत कम बिजुली खपत र ६ प्रतिशत वजन कम छ। अर्कोतर्फ ओला इलेक्ट्रिकले कम्पनीको एस१ एयरको बुकिङ ५० हजार नाघेको जनाएको छ । यसका साथसाथै ओला इलेक्ट्रिकले भविष्यमा लन्च हुने आफ्ना आगामी इलेक्ट्रिक बाइकहरू पनि प्रदर्शन गरेको छ ।