टेस्ला ईभीमा पहिलोपटक अफरको ओइरो, बिक्री बढाउनुपर्ने दवावमा कम्पनी

टेस्लाले अमेरिकामा विभिन्न छुट र अफरहरूको प्याकेज ल्याएको छ । लगातार दोस्रो वर्ष पनि बिक्री घट्ने अवस्थाबाट बच्न टेस्लाले अफरको ओइरो नै ल्याएको हो ।

टेस्लाले मोडल वाई स्ट्यान्डर्डको खरिदमा ७२ महिनासम्मका लागि ० प्रतिशत ब्याजदरमा फाइनान्सिङ सुविधा दिइरहेको छ । साथै, उसले आफ्नो वेबसाइटमा कुनै अग्रिम भुक्तानी बिना नै मोडल वाई भाडामा लिन सकिने विकल्पको पनि विज्ञापन गरिरहेको छ ।

खरिदकर्ताहरूले आफ्नो पेट्रोल वा डिजेल गाडी साटेर २ हजार माइलको निःशुल्क सुपरचार्जिङ सुविधा पाउन सक्छन् । साथै, टेस्लाले मौज्दातमा रहेका गाडीहरूमा १५ सय डलरसम्म पर्ने प्रिमियम पेन्ट, टो हिच र १९ इन्चको नोभा ह्विल जस्ता अपग्रेडहरू निःशुल्क प्रदान गरिरहेको छ ।

टेस्लाले प्रायः वर्षको अन्त्यमा थप सहुलियतहरू दिने गर्छ । तर, यसपटक सन् २०२४ मा पहिलोपटक वार्षिक बिक्रीमा गिरावट आएपछि कम्पनी अर्को वर्ष पनि बिक्री घट्ने अवस्था आउन नदिन हतारिरहेको छ ।

सेप्टेम्बर महिनामा ट्रम्प प्रशासनले नयाँ विद्युतीय सवारीका लागि दिइँदै आएको ७५ सय डलरको कर छुट (ट्याक्स क्रेडिट) खारेज गरेपछि टेस्लाले अमेरिकामा पनि ठूलो अवरोधको सामना गरिरहेको छ । एक तथ्यांकअनुसार, कर छुट हटेपछि सेप्टेम्बर र अक्टोबरको बीचमा अमेरिकामा टेस्लाको बिक्री ३५ प्रतिशतले घटेको छ ।