आर्थिक मन्दीको असर नयाँ वर्ष अफरमा देखियो, धेरै कार ब्रान्डले ल्याएनन् अफर

काठमाडौं– आर्थिक मन्दीका कारण अटोमोबाइल बजार अहिले निकै कठिन अवस्थाबाट गुज्रिरहेको छ । वैंक तथा वित्तीय संस्थाले अटोलोन दिन ठप्पजस्तै पार्नु र मन्दीकै कारण उपभोक्ताले आफ्नो आयस्रोत गुमाउनु लगायत कारण बजारमा अहिले गाडी किन्ने ग्राहक नै भेटिन छाडेका छन् । एकाध ब्रान्डका इलेक्ट्रिक कार बाहेक अहिले प्रायः सवैजसो ब्रान्डका प्यासेन्जर कारको बिक्री नराम्रोसँग प्रभावित बनिरहेको छ ।

अटोमोबाइल बजारमा देखिएको मन्दीको असर व्यवसायीले ल्याउने नयाँ वर्ष अफरमा समेत देखिएको छ । यसअघिका नयाँ वर्षमा हर्ष र उल्लासका साथ गाडी बिक्री गर्न तम्सिँदै आएका अधिकांश व्यवसायीले अहिले नयाँ वर्ष अफर नै ल्याएका छैनन् । जतिले ल्याएका छन ती पनि अघिल्ला वर्षहरुको तुलनामा निकै सामान्य रहेको छ ।

यो वर्ष बजारमा हुन्डाई, होन्डा, टाटा, सुजुकी, चांगन, निसान, फोटोन र ग्रेटवालले मात्र नयाँ वर्ष अफर ल्याएका छन् । वाँकी धेरै ब्रान्डले अफर ल्याएका छैनन् । यद्यपि अघिल्ला वर्षहरुमा चर्चामा रहने टाटा र सुजुकीले समेत यो वर्ष अफरको धेरै चर्चा गरेका छैनन् । धेरै कम्पनीहरुले सामाजिक सञ्जाल र आफ्ना डिलर नेटवर्कमा मात्र चर्चालाई सीमित गरेको पाइन्छ ।

यो वर्ष किया, जिप, स्कोडा, फक्सवागन, फोर्ड, एमजी लगायत ब्रान्डमा पनि नयाँ वर्ष अफर आएको छैन । यी ब्रान्डले यसअघिका नयाँ वर्षमा आकर्षक अफर ल्याउने गरेका थिए । महिन्द्राले त झन् प्रायः सामान्य अवस्थामा समेत अफर नल्याउने गरेको इतिहास छ । यो वर्ष बजारमा मन्दी रहेको र यस्तो अवस्थामा जस्तोसुकै आकर्षक अफर ल्याएपनि गाडीको बिक्री बढाउन नसकिने निचोड निकाल्दै यी ब्रान्डले अफरमा रुचि नदेखाएको अनुमान गर्न सकिन्छ ।