अनिवार्य छ र फेस्टिभल अफर ? नो फेस्टिभल अफरमा दृढ छन् यी कम्पनी

दशैं/तिहार नजिकिएसँगै अहिले विभिन्न अटोमोबाइल कम्पनीहरुले धमाधम स्किम सार्बजनिक गरिरहेका छन् । प्रायः सबैजसो ठूला र प्रचलित ब्रान्डले यस्तो अफर सार्वजनिक गरिसकेपनि केही कम्पनीहरुले भने अझैपनि अफर सार्वजनिक गरेका छैनन् । दशैं आउन अब मात्र १० दिन बाँकी रहेका कारण यो बिचमा बाँकी कम्पनीहरुले नयाँ स्किम ल्याउने सम्भावना समेत निकै न्यून रहेको देखिन्छ ।

गाडीतर्फ हालसम्म महिन्द्रा, टोयोटा, स्कोडा, फक्सवागन, किया, एमजी र बीवाईडी जस्ता ब्रान्डको कारोबार गर्ने कम्पनीहरुले नयाँ स्किम ल्याएका छैनन् । सम्भवतः उनीहरुले यसपालिको चाडपर्बमा नयाँ स्किम ल्याउनेछैनन् ।

नेपाली बजारमा सर्बाधिक बिक्री हुनेमध्ये एक महिन्द्राले बिगतदेखि नै चाडपर्वमा नयाँ अफर ल्याउने गरेको छैन । त्यसैले यसपालि पनि महिन्द्राको अफर आउने देखिँदैन । त्यसैगरी टोयोटाले समेत प्रायः दशैं तिहारमा स्किम ल्याउने गरको पाइदैन ।

सेल्टोस र सोनेट एसयूभीको माग उच्च रहेका कारण किया गाडीको आधिकारिक बितरक कन्टिनेन्टल ट्रेडिङ इन्टरप्राइजेजले समेत हालसम्म स्किम ल्याउने कुनै तयारी गरेको छैन ।

बजारमा यी गाडीको माग उच्च रहेका कारण कियालाई स्किममार्फत नयाँ ग्राहक तान्न आबश्यक नभएका कारण यस्तो अफर सार्बजनिक नगरिएको अनुमान लगाउन सकिन्छ ।

नयाँ एसयूभी कुसाकलाई बजारमा उतारेर चर्चा बटुलेको एमएडब्लु इन्टरप्राइजेजले पनि यसपाली औपचारिक रुपमा स्किम नल्याउने देखिन्छ । यो एसयूभीको समेत बजारमा माग उच्च भएका कारण उसलाई स्किमको जरुरी नभएको हुनसक्छ ।

इलेक्ट्रिक कारको बिक्रीबाट चर्चामा आएको एमजी र बीवाईडीले पनि हालसम्म कुनै अफर सार्बजनिक गरेको छैन । बजारमा अहिले इलेक्ट्रिक कारको माग उच्च भएपनि सबैजसो कम्पनीले आपूर्ति गर्न सकिरहेका छैनन् । जसका कारण पनि एमजी र बीवाईडीले यसपाली अफर ल्याउने छाँटकाँट नदेखाएका हुनसक्छन् ।

त्यसैगरी अफर ल्याएका निसान र सुजुकीले पनि आफ्ना प्रचलित र माग उच्च भएका कारमा स्किम दिएको छैन । निसानले किक्स एसयुभीमा स्किम उपलब्ध गराउँदै आएपनि अर्को सब फोर मिटर एसयूभी म्याग्नाइटमा यस्तो सुबिधा दिएको छैन । अहिले बजारमा यो एसयूभीको माग उच्च छ ।

उता सुजुकी र टाटाले पनि आफ्नो लोकप्रिय मोडलका कारमा स्किम उपलब्ध गराएको छैन । सुजुकीले ब्रेजा र स्विफ्ट लगायत मोडलमा स्किम उपलब्ध गराएको छैन भने टाटाले नेक्सन ईभीमा यस्तो सुबिधा दिएको छैन । यी दुई ब्रान्डले अन्य मोडलका कारमा भने दशैं अफर अन्तर्गत स्किम उपलब्ध गराउँदै आएका छन् ।

चाडपर्वमा स्किम र अफर सार्वजनिक गर्नु एउटा अनिवार्य शर्त जस्तै बनेको छ । यद्यपि कतिपय कम्पनीहरु यो मान्यता विपरित पनि राम्रै तरिकाले बजारमा टिकिरहेको मान्न सकिन्छ ।