बजाज र टीभीएस बाहेक अन्य ब्रान्डसँग १५० सीसी माथिको मोटरसाइकल नहुने, यी बाइकलाई असर नपर्ने

सरकारले १५० सीसी माथिका मोटरसाइकल आयातमा पूर्ण प्रतिबन्ध लगाएको छ । जसका कारण भदौ १५ सम्मका लागि यो सेग्मेन्टका मोटरसाइकल नेपाल भित्रिने बाटो वन्द भएको छ । सो समयपछि प्रतिबन्ध हटे सबै ब्रान्डले आयात सुचारु गर्न सक्नेछन् ।

तर अहिलेको अवस्थालाई हेर्दा भदौ १५ पछि पनि प्रतिबन्ध हट्ने छाँटकाँट भने देखिँदैन । वैशाख १३ देखि असार मसान्तसम्मका लागि भनेर लागू गरिएको पहिलो चरणको प्रतिबन्ध उक्त समयसीमा पछि खुल्ने स्वयं उद्योग वाणिज्य तथा आपूर्ति मन्त्री दिलेन्द्र प्रसाद बडु र व्यवसायीले बताउँदै आएका थिए । तर अन्तिम समयमा आएर मध्यरातमा राजपत्रमा सूचना प्रकाशन गर्दै यसअघिको प्रतिबन्धलाई झनै कडाई गरी भदौ १५ सम्मका लागि यसलाई लम्ब्याइयो ।

नेपाल राष्ट्र बैंकले केहीदिन पहिले जारी गरेको मौद्रिक नीतिमा ७ महिनासम्मको आयात धान्न पुग्ने विदेशी मुद्राको सञ्चिति नरहुन्जेलसम्म आयातमाथिको प्रतिबन्ध नहट्ने स्पष्ट उल्लेख गरिएको छ । अहिलेकै अवस्थामा भदौ १५ सम्म उक्त रकम सञ्चिति नहुने समेत देखिएका कारण पनि प्रतिबन्ध लम्विने देखिएको हो ।

यदि भदौ १५ पछि पनि प्रतिबन्ध लम्विने हो भने नेपाली बजारमा बजाज र टीभीएस बाहेक अन्य ब्रान्डसँग १५० सीसी माथिका मोटरसाइकल उपलब्ध नहुने देखिन्छ । यी दुई ब्रान्डले कारोबार गर्ने अधिकांश मोडलका मोटरसाइकल यही एसेम्वल गरी बिक्री गर्ने र यसरी एसेम्वल गर्दा चाहिने सामानको आयातमा कुनै रोकावट नभएका कारण यस्तो देखिएको हो ।

बजाजले ११ मोडलमा १७ भेरिएन्टका मोटरसाइकल नेपालमै एसेम्बल गर्दै आइरहेको छ । उसले बिक्री गर्ने कुल १८ भेरिएन्ट मध्ये एभेन्जर २२० क्रुज बाहेक सवै मोटरसाइकल नेपालमै एसेम्वल गरिरहेको हो । जसमा १ सय सीसी क्षमताको प्लाटिनादेखि ४०० सीसीको डोमिनारसम्म सामेल छन् । यी बाइक एसेम्वल गर्न आवश्यक पर्ने स्पेयर पार्ट्स तथा किटको आयातमा प्रतिबन्ध नलागेका कारण एसेम्बलमा समस्या रहने देखिँदैन ।

यसैगरी टीभीएसले पनि केही भेरिएन्ट बाहेक प्रायः सवैजसो बाइक यहीको प्लान्टमा एसेम्बल गर्दै आइरहेको छ । १५० सीसी माथि सेग्मेन्टमा टीभीएससँग अपाचे आरटीआर १६०, १८० र २२० तथा आरआर ३१० मोडल उपलब्ध रहँदै आएको छ । जसमध्ये आरआर ३१० वाहेक अन्य बाइक नेपालमै एसेम्बल गरिन्छ ।

यो सेग्मेन्टमा अन्य ब्रान्डका ३ दर्जन हाराहारी मोडलका मोटरसाइकलको आयात भने प्रभावित बनिरहेको छ । जसका कारण प्रतिबन्ध अझै लम्विए यी बाइकको नेपाली बजार प्रभावित बन्ने देखिन्छ ।