नयाँ अध्ययन : ईभी ब्याट्री चाँडै बिग्रिन्छ भन्ने डर गलत सावित

विद्युतीय सवारीसाधन (ईभी) को ब्याट्री छिट्टै कमजोर हुन्छ भन्ने आम धारणा गलत भएको एक ठूलो नयाँ अध्ययनले देखाएको छ। अध्ययन अनुसार औसत रूपमा ईभी ब्याट्रीले वर्षमा करिब २ प्रतिशत मात्र क्षमता गुमाउँछ।

यसको अर्थ यदि कुनै ईभी १० वर्ष पुरानो भयो भने पनि त्यसको ब्याट्रीमा करिब ८२ प्रतिशत क्षमता बाँकी रहन्छ। उदाहरणका लागि, सुरुमा एक पटक चार्जमा ५१५ किलोमिटर चल्ने ईभी १० वर्षपछि पनि करिब ४२२ किलोमिटर चल्न सक्ने अध्ययनले देखाएको छ।

२२ हजारभन्दा बढी ईभीमा आधारित अध्ययन

यो तथ्यांक फ्लिट म्यानेजमेन्ट कम्पनी जियोट्याबले सार्वजनिक गरेको हो। कम्पनीले २१ फरक–फरक मोडलका २२ हजार ७ सय भन्दा बढी ईभीबाट संकलन गरिएको टेलिम्याटिक डेटा विश्लेषण गरेको थियो।

अध्ययनमा केही इलेक्ट्रिक भ्यानहरू पनि समावेश भएकाले औसत गिरावट दर अलिकति बढी देखिएको उल्लेख गरिएको छ। भ्यानहरूको ब्याट्री क्षमता औसतमा वर्षमा २.७ प्रतिशत घट्ने देखिएको छ, जसको मुख्य कारण छोटो रेन्ज र बारम्बार फास्ट चार्जिङ गर्नु हो।

फास्ट चार्जिङले ब्याट्रीमा असर गर्छ

अध्ययनले ब्याट्री दीर्घायु बनाउने केही महत्वपूर्ण सुझावहरू पनि दिएको छ। कुल चार्जमध्ये आठमा एक पटकभन्दा कम फास्ट चार्जिङ गर्ने ईभीहरूले वर्षमा केवल १.५ प्रतिशत मात्र क्षमता गुमाएका छन्।
१०० किलोवाटभन्दा कम डीसी फास्ट चार्जिङ बढी प्रयोग गर्दा २.२ प्रतिशत क्षमता घटेको देखियो।
१०० किलोवाटभन्दा माथिको फास्ट चार्जिङ धेरै प्रयोग गर्दा भने ब्याट्री क्षमता ३ प्रतिशत प्रतिवर्ष घट्ने देखिएको छ। विशेषज्ञहरूका अनुसार, लामो दूरीको यात्रामा मात्र फास्ट चार्जिङ प्रयोग गर्नु उपयुक्त हुन्छ।

१०० प्रतिशत चार्ज र ० प्रतिशत डिस्चार्ज : डराउनु पर्दैन

धेरै ईभीमा ब्याट्रीलाई १०० प्रतिशत चार्ज वा पूर्ण रूपमा ० प्रतिशत सम्म खाली नगर्न सुझाव दिइन्छ। तर अध्ययन अनुसार, सामान्य प्रयोगमा यसले ठूलो असर पार्दैन। तर, यदि गाडी लामो समयसम्म १०० प्रतिशत चार्ज वा ० प्रतिशत अवस्थामा पार्क गरियो भने ब्याट्री क्षय दर ०.५ प्रतिशतले बढी हुन सक्छ। अर्थात्, चार्ज गरेपछि चलाउने र ब्याट्री सकिएपछि छिट्टै चार्ज गर्नु नै उत्तम उपाय हो।

अत्यधिक तातो मौसममा ईभी ब्याट्रीको क्षय दर ०.४ प्रतिशतले बढ्ने अध्ययनले देखाएको छ। त्यसैले सम्भव भएसम्म छायाँमा पार्क गर्ने सल्लाह दिइएको छ। कम दूरी चल्ने, हप्तामा एक पटकभन्दा कम चार्ज साइकल हुने गाडीमा ब्याट्री क्षमता १.५ प्रतिशत प्रतिवर्ष घट्ने देखिएको छ। तर दैनिक धेरै चल्ने, विशेषगरी व्यावसायिक भ्यानहरूमा यो दर २.३ प्रतिशत प्रतिवर्ष पुगेको छ।

निजी प्रयोगकर्ताका लागि राम्रो खबर

जियोट्याबका अनुसार, सामान्य निजी प्रयोगकर्ताले राति घरमै चार्ज गर्ने भएकाले उनीहरूको ईभी ब्याट्रीको गिरावट दर निकै कम हुने सम्भावना छ। औसत प्रयोग भएको निजी ईभीमा १० वर्षपछि पनि करिब ९० प्रतिशत क्षमता बाँकी रहने अनुमान गरिएको छ।

यो अध्ययनले ईभी ब्याट्रीको आयुबारे गरिएको डर अतिरञ्जित थियो भन्ने देखाएको छ । सही चार्जिङ बानी, अत्यधिक फास्ट चार्जिङबाट जोगिनु र तातो मौसममा सावधानी अपनाएमा ईभी ब्याट्री दीर्घकालसम्म भरपर्दो रहने स्पष्ट भएको छ।