नेपालमै बनेको यति हेल्मेटको नयाँ मोडल बजारमा

काठमाडौं – रुपन्देहीको देवदहमा अवस्थित मयुर स्टिल इन्डष्ट्रिजले उत्पादन गरेको यति ब्रान्डको हेल्मेट नयाँ मोडलमा उपलब्ध भएको छ । सीई र आईएसओ सर्टिफाइड सो हेल्मेट विभिन्न ६ कलर अप्सनमा उपलब्ध छ ।

मोटोक्रस र डर्ट बाइक चढ्न रुचाउनेहरुका लागि विशेष रुपमा डिजाइन गरिएको सो हेल्मेट फुल फेस हेल्मेट हो । त्यसैगरी अनब्रेकेबल भएकाले यो निकै नै सुरक्षित समेत छ । सुरक्षाका सबै मापदण्ड पुरा गरी उत्पादन गरिएको बताइएको सो हेल्मेटको भित्रका पार्ट्स वासेबल छ ।

हाई डेन्सिटी थर्मोकोल र हाई क्वालिटी पेन्ट प्रयोग भएको सो हेल्मेटको मूल्य ५ हजार ५ सय रुपैयाँ तोकिएको मयुर स्टिल इन्डष्ट्रिजका म्यानेजिङ डाइरेक्टर महेश थैवले बताए । नेपाली बजारमा उपलब्ध अन्तर्राष्ट्रिय ब्रान्ड सरहकै गुणस्तरीय भए पनि यसको मूल्य भने तुलनात्मक रुपमा सस्तो भएको उनको भनाइ छ ।

मयुर स्टिल इन्डष्ट्रिजले उत्पादन गरेका हेल्मेटको माग पछिल्लो समयमा बढ्दै गएको छ । नेपाली उत्पादन अनि आवश्यक सुरक्षात्मक व्यवस्थापनका साथ उत्पादन गरिएको बताइने ‘यति’ ब्रान्डका हेल्मेट नेपालको पहिचान बनेका छन् ।