नेपालीको ईभी मोह : ३ दिन लगातार ३ नयाँ गाडी सार्वजनिक

काठमाडौं– नेपालको अटोमोबाईल बजार अहिले पूर्णत ईभीमय बनेको छ । गाडी क्रेता, बिक्रेता र संचार माध्यमदेखी सदनसम्मै ईभीले चर्चा पाइरहेको छ । ईभीमा पनि विशेषगरी प्यासेन्जर कार र भ्यान तथा माइक्रो अहिले आम चासोको विषय बन्न थालेको हो ।

इलेक्ट्रिक गाडीमा ग्राहकको आकर्षण बढ्न थालेपछि व्यवसायीमाझ कसले कुन नयाँ ब्राण्ड ल्याउने विषयमा चर्को प्रतिस्पर्धा समेत हुन थालेको छ । फलस्वरुप पछिल्ला केही हप्तामा नयाँ ब्राण्ड सार्बजनिक हुने लहर नै चलेको छ । नेपालीको बढ्दो ईभी मोहलाई मध्येनजर गरी यो हप्तामात्रै ३ वटा नयाँ विद्युतिय गाडी सार्बजनिक भइसकेका छन् । भने भोली शनिबार महिन्द्राको नयाँ ईभी एक्सयुभी ४०० लन्च हुने तयारीमा छ ।

यो हप्ता बजारमा सोकोन ब्राण्डको विद्युतिय भ्यान र काई एक्स–३ प्रो एसयूभी औपचारिक रुपमा नेपाल आएको घोषणा गरिएको छ भने सेरेस–३ को फेसलिफ्ट पनि यसै हप्ता लन्च गरिएको छ । सोकोन ब्राण्डको ११ सिटर भ्यान ईसी३ लाई एमएडब्लु बृद्धि कमर्सियल भेइकलले नेपाल ल्याएको हो । गत मंगलबार सार्बजनिक गरिएको यो ईभी भ्यानको मूल्य ४५ लाख ५० हजार निर्धारण गरिएको छ ।

यसैगरी, एमएडब्लु ग्रुप अन्तर्गतको अर्को कम्पनी एमएडब्लु बृद्धि अटो कर्पले गत बुधबार एक भब्य कार्यक्रममाझ सेरेस–३ को फेसलिफ्ट भर्सन लन्च गर्यो । फ्रन्ट फेसियालाई अपग्रेड गरी ल्याइएको यसको कम्फर्ट भेरिएन्टको मूल्य ५० लाख र प्रिमियमको ५३ लाख निर्धारण गरिएको छ । जुन बजेट अघिकै पुरानो मूल्यले निरन्तरता पाएको हो ।

हुन्डाई र बिएमडब्लु जस्ता चर्चित ब्राण्डको कम्वसन तथा ईभी आयत गरी बिक्री गर्दै आएको लक्ष्मी ग्रुपले चिनियाँ ब्राण्डको नयाँ ईभी काई एक्स–३ प्रोको बुकिङ लिन सुरु गरेको छ । विहिबार नयाँ शोरुमको उद्घाटन गरी गाडीको मूल्य समेत सार्बनिक गर्दै ग्रुप अन्तर्गतको अर्को कम्पनी लक्ष्मी ई–मोविलिटीले यसको बुकिङ लिन थालेको हो ।

दुई भेरिएन्टमा नेपाल आउने यसको डिलक्स भेरिएन्टलाई ४६ लाख ९६ हजार र फ्ल्यागशिप भेरिएन्टलाई ४८ लाख ९६ हजार रुपैयाँ पर्ने जनाइएको छ । यो गाडी लक्ष्मी ग्रुप सहित गोल्छा अर्गनाइजेनस र एलआरआर मोटर्सले समेत आयत गर्दैछन् ।