२५० किमी रेन्ज र ड्यासक्याम फिचर, यस्तो छ सिट्रोनको नयाँ इलेक्ट्रिक कार

सिट्रोनले भारतीय बजारमा आफ्नो इलेक्ट्रिक कार ई–सी३ को नयाँ र अपडेटेड संस्करण ई–सी३एक्स सार्वजनिक गरेको छ । अत्याधुनिक फिचर्स र नयाँ प्रविधिसहित आएको यस इलेक्ट्रिक गाडीको सुरुवाती मूल्य १० लाख २५ हजार भारु निर्धारण गरिएको छ ।

नयाँ ई–सी३ मा सिट्रोनले ग्राहकहरूका लागि विशेष ’ब्याट्री–एज–ए–सर्भिस’ विकल्प पनि उपलब्ध गराएको छ । यस अन्तर्गत ग्राहकले गाडी खरिद गर्दा ब्याट्रीको छुट्टै पैसा तिर्नु पर्दैन, बरु प्रयोगका आधारमा प्रति किलोमिटर मात्र रु २.२६ ब्याट्री भाडा बुझाउनु पर्नेछ । कम्पनीले यस गाडीलाई लाइभ, लाइभ ओ र र शाइन गरी तीनवटा भेरिएन्टमा उतारेको हो ।

ई–सी३ एक्सको बाहिरी डिजाइनलाई आकर्षक देखाउन सिट्रोनले यसमा आकर्षक एलईडी हेडलाइट, डीआरएलएस, १५ इन्चको डायमंड–कट एलोय ह्वील र अटो फोल्ड सुविधासहितको इलेक्ट्रिकल्ली एडजस्टेबल साइड मिरर (ओआरभीएम) दिएको छ ।

गाडीको भित्री भाग (इन्टेरियर) मा पनि व्यापक परिमार्जन गरिएको छ । यसमाः डुअल–टोन लेदरेट सिट र ७–इन्चको टीएफटी इन्स्ट्रुमेन्ट क्लस्टर, वायरलेस एन्ड्रोइड अटो र एप्पल कारप्ले सपोर्ट गर्ने १०.२५ इन्चको ठूलो टचस्क्रिन इन्फोटेनमेन्ट सिस्टम पाउन सकिन्छ । साथै, इलेक्ट्रोक्रोमिक आईआरभीएम र वायरलेस मोबाइल चार्जर तथा ग्राहकले आफ्नो् आवश्यकता अनुसार, जेबीएल साउन्ड सिस्टम र सुरक्षाका लागि अगाडि तथा पछाडिको ड्यासक्याम समेत जडान गर्न सक्नेछन् ।

सिट्रोन ई–सी३ एक्समा २९.२ किलोवाट आवर क्षमताको ब्याट्री प्याक जडान गरिएको छ, जसले सिंगल चार्जमा लगभग २५० किलोमिटरसम्मको रेन्ज प्रदान गर्ने दाबी कम्पनीको छ । कारमा ५६ बीएचपी र १४३ एनएम टर्क जेनेरेट गर्न सक्षम फ्रन्ट माउन्टेड मोटर उपलब्ध छ ।