५०१ किलोमिटर रेन्ज र आकर्षक मूल्यसहित नयाँ एट्टो२ सार्वजनिक

काठमाडौं–बीवाईडीले आफ्नो चर्चित कम्प्याक्ट क्रसओभर एट्टो२ को २०२७ संस्करण चीनमा सार्वजनिक गरेको छ ।

कम्पनीले यस नयाँ मोडललाई अत्याधुनिक प्रविधि, थप ब्याट्री क्षमता र आक्रामक मूल्य रणनीतिका साथ बजारमा उतारेको हो । कारको मूल्य ११ हजार १५० अमेरिकी डलर निर्धारण गरिएको छ ।

नयाँ एट्टो२ मा मुख्य आकर्षणका रूपमा ५०१ किलोमिटर (सीएलटीसी) सम्मको रेन्ज दिने नयाँ ब्याट्री प्याक थपिएको छ । फिनड्रिम्सद्वारा निर्मित ५१.१३ किलोवाट आवरको ब्लेड ब्याट्री जडित यस मोडलले प्रयोगकर्तालाई लामो दूरीको यात्रामा थप सहजता प्रदान गर्ने विश्वास लिइएको छ ।

यसपटक बीवाईडीले सबै पाँचवटा भेरियन्टमा ७० किलोवाट क्षमताको फ्रन्ट माउन्टेड मोटर प्रयोग गरेको छ । डिसी फास्ट चार्जिङ प्रविधिको प्रयोग गरी यसको ब्याट्रीलाई मात्र ३० मिनेटमा ३० प्रतिशतबाट ८० प्रतिशतसम्म चार्ज गर्न सकिन्छ ।

कारको भित्री सजावट र क्याबिन एर्गोनमिक्समा पनि व्यापक सुधार गरिएको छ । सेन्टर कन्सोलमा रहेको गियर नोबलाई स्टेयरिङ कोलममा सारिएकाले ५० वाटको वायरलेस फोन चार्जर मुनि थप सामान राख्ने ठाउँ उपलब्ध भएको छ ।

क्याबिनभित्र १२.८ इन्चको घुम्ने टचस्क्रीन इन्फोटेनमेन्ट सिस्टम, ८.८ इन्चको ड्राइभर डिस्प्ले, अगाडिका सिटमा हिटिङ र भेन्टिलेसन, तथा प्यानोरमिक ग्लास रुफ जस्ता विलासी सुविधाहरू समावेश छन् । बढ्दो बजार प्रतिस्पर्धालाई सम्बोधन गर्न ल्याइएको यो मोडलले बीवाईडीको विश्वव्यापी बजार उपस्थितिलाई अझ सुदृढ बनाउने विश्वास लिइएको छ ।