सिंगापुर ग्रांपीको रोमाञ्चकतामा रमाउदै नेपाली मोटर स्पोर्ट्स प्रेमीहरु

सिंगापुर ग्रान्ड प्रिक्स अर्थात छोटकरीमा सिंगापुर ग्रांपी आगामी आइतबार अक्टोबर २ तारिखमा सिंगापुरको प्रसिद्ध रेसिङ सर्किट ‘मरिना बे स्ट्रिट सर्किट’ मा आयोजना हुँदैछ । सो अवसरमा विभिन्न कम्पनीका रेसिङ ड्राइभरहरुले सडकमा कार कुदाएर कार रेसको रोमान्चकता सबैलाई बाँड्ने छन् ।

सडकमै अस्थायी रुपमा बनाइएकाले यसलाई स्ट्रिट सर्किट भनिएको हो । सिंगापुरको मरिना बे नजिक सो प्रतियोगिता आयोजना गरिन्छ । यसको लम्बाई ५.०६३ किलोमिटर छ र ६१ ल्यापमा प्रतियोगिता आयोजना हुन्छ । यसका आधारमा ड्राइभरहरुले समग्र ३०८.७०६ किलोमिटरको रेस पुरा गर्छन् ।

सन् २०२० र २०२१ को रेस कोभिडको कारणले हुन सकेको थिएन । दुई वर्ष पश्चात हुन लागेको रेस भएकाले पनि यसप्रति अहिले धेरैको चासो रहेको छ ।

२०२२ एफआईए फर्मुला वान वर्ल्ड च्याम्पियनसिप चाहिं फर्मुला वान कारहरुका बीच हुने मोटर रेसिङ च्याम्पियनसिप हो । फर्मुला वान वर्ल्ड च्याम्पियनसिपको यो ७३औं संस्करण हो । इन्टरनेसनल मोटरस्पोर्टको गभर्निङ बडी एफआर्ईए अर्थात फेडरेसन इन्टरनेसनल डेल अटोमोबाइलद्वारा मान्यता प्राप्त सो रेस ओपन–ह्विल रेसिङका बीचमा हुने उच्च स्तरको प्रतिस्पर्धात्मक रेस हो ।

विश्वका विभिन्न स्थानमा हुने २२ ग्रांपी पश्चात विजेता घोषणा गरिन्छ । सिंगापुरमा हुने रेस चाहिं १७औं ग्रांपी हो । यो वर्ष चाहि. फिफा वर्ल्ड कप फुटबल समेत हुने भएको र सो समयमा ओभरल्याप नहोस् भन्ने उद्देश्यले अलि पहिले नै फर्मुला वान ग्रांपी सक्ने योजना छ ।

शुक्रबार र शनिबार फ्रि प्राक्टिस छ भने आइतबार अर्थात अक्टोबर २ मा रेस प्रतियोगिता हुनेछ । स्थानीय समय अनुसार बेलुकी ८ बजे हुने सो रेस निकै नै रोमान्चक हुनेछ ।

मर्सिडिज र फरारी ड्राइभरले नै सन् २०१४ देखि २०१९ सम्मको सिंगापुर ग्रांपी जितेका छन् । मर्सिडिजले चार पटक जितेको छ र यसको ड्राइभर लुइस ह्यामिल्टनले मात्र तीन पटक सो रेस जितेका छन् । त्यसैगरी फरारीले सन् २०१५ र २०१९ गरी दुई पटक सो रेस जितेको छ ।

सन् २०१९ मा सबास्टियन भेटेलले सो रेस जितेका थिए । त्यसैगरी चार्ल्स लेक्रेक र म्याक्स भर्स्ट्यापन क्रमशः दोस्रो र तेस्रो भएका थिए ।

सिंगापुर ग्रांपी सिंगापुरको सडकलाई नै ट्रयाकको रुपमा प्रयोग गरी आयोजना गरिन्छ । यो समयमा सडक नै बन्द गरिन्छ । केही दिन पहिले देखि नै यसको तयारी गरिन्छ । सडकमै दर्शकहरुका लागि प्यारापिट समेत बनाइएको हुन्छ ।

सिंगापुर अहिले विश्वका मोटर स्पोर्ट्स प्रेमीहरुका लागि आकर्षक छ । आइतबार आयोजना हुने अन्तिम रेस प्रतियोगिताका लागि विश्वका विभिन्न देशबाट खेलाडी र दर्शकहरु यही भेला भएका छन् ।

यस पंक्तिकारका साथ नेपाल अटोमोबाइल्स एसोसिएसन (नासा) का महासचिव सुशील तण्डुकार, फोटोग्राफर ईश्वर वल्लभ उप्रेती र नासा अफिसियल सौगात राजभण्डारी समेत ग्रांपी तयारी भइरहेको समयमा सो सर्किटमा पुगेका थिए ।

सिंगापुरबाट एकराज सुवेदी