सुपर लिगमा काठमाडौं रेजर्सको तयारी, विकेश कुथु मार्की प्लेयर र बाल गोपाल महर्जन मुख्य प्रशिक्षक

काठमाडौं – नेपाल इभेन्ट म्यानेजमेन्ट कम्पनीको आयोजना र एन्फाको प्राविधिक सहयोगमा आगामी अप्रिल ८, २०२२ अर्थात चैत २५, २०७८ देखि दशरथ रंगशालामा दोस्रो नेपाल सुपर लिग हुँदैछ । सो अवसरमा यामाहा, स्कोडा, जिप लगायतका विभिन्न अटोमोबाइल ब्रान्ड आयात गरिरहेको एमएडब्ल्युको स्वामित्वमा रहेको काठमाडौं रेजर्सले सहभागितालाई निरन्तरता दिदैं उत्कृष्ट प्रदर्शनको तयारीमा रहेको जानकारी गराएको छ ।

नेपाली फुटबलको सर्वाङ्गिण बिकासका लागि विभिन्न व्यापारिक घरानाहरूले पनि यस पक्षमा बिशेष चासोको साथ लगानी गरेर टिम निर्माण गरेका छन् । गत सिजनमा यो टिमले उत्कृष्ट प्रदर्शन गर्दै प्रथम हुन सफल भएको थियो ।

काठमाडौं रेजर्सका डाइरेक्टर विज्ञानराज शर्माले यस वर्ष पनि उत्कृष्ट प्रदर्शन गर्दै ट्रफी आफूहरुले नैे राख्ने गरि कार्य आरम्भ पनि गरिसकेको बताए । उनले भने, ‘हाम्रो एनएसएलमा सहभागिताले नेपाली फुटबलको दीर्घकालीन विकासका लागि ठूलो सहयोग पुग्ने छ भन्ने विश्वास हामीले लिएका छौ ।’

काठमाडौं रेजर्सले यसपाली पनि फुटबलका सफल गोलकिपर पूूर्व कप्तान विकेश कुथुलाई मार्की प्लेयर र राष्ट्रिय टिमका सफल प्रशिक्षक बाल गोपाल महर्जनलाई मुख्य प्रशिक्षकमा नै निरन्तरता दिएको छ ।

आज आयोजित कार्यक्रममा टिमका साथमा एमएडब्लु इन्टरप्राइजेजका प्रबन्ध निर्देशक विष्णुकुमार अग्रवाल समेतको सहभागिता रहेको थियो ।