राइट ह्यान्ड ड्राइभमा पनि आयो जिकर, नेपाल आउने संभावना बलियो

काठमाडौं– जिली मातहतको ईभी ब्राण्ड जिकर राइट ह्यान्ड ड्राइभमा समेत आएको छ । अन्तराष्ट्रिय बजारमा निर्यात गर्न कम्पनीले यसको एक्स मोडलमा राइट ह्यान्ड ड्राइभ दिएर उत्पादन सुरु गरेको हो । । सो नयाँ ईभी अष्ट्रेलिया हुँदै थाइल्यान्ड र अन्य मुलुकमा समेत निर्यात हुनेछ ।

यो नयाँ ब्राण्ड अवको केही समयपछि नेपाली बजारमा समेत भित्रिने सहजै अनुमान गर्न सकिन्छ । गत मार्चमा थाइल्यान्डमा आयोजना भएको बैंकक इन्टरनेश्नल मोटर शोमा प्रि अर्डर खुल्ला गरिएपछि यो ब्राण्ड राइट ह्यान्ड ड्राइभमा आउने पक्कापक्कि भएको थियो । त्यसपछि नेपालका थुप्रै व्यवसायी जिकरलाई नेपाल ल्याउन दौडधुप गरिरहेका छन् ।

यो नयाँ कारको रियर ह्विल ड्राइभ भर्सनमा २०० किलोवाट क्षमताको मोटर जडान गरिएको छ । कम्पनीले हालै यसको २०२४ मोडललाई अल ह्विल ड्राइभ भर्सनमा समेत उतारेको छ । जसअनुसार अल ह्विल ड्राइभ अन्तर्गत यसको फ्रन्ट एक्सलमा ११५ किलोवाट क्षमताको अतिरिक्त मोटर राखिएको छ ।

कारमा ६६ किलोवाट आवरको सिएटिएल ब्याट्री जडान गरिएको छ । जसलाई फुल चार्ज गर्दा सिंगल मोटर भर्सनले ५६० किलोमिटर र अल ह्विल ड्राइभ भर्सनले ५०० किलोमिटर रेन्ज दिने दावी गरिएको छ ।

कारमा १४.६ इन्चको इन्फोटेन्मेन्ट सिस्टम, ८.८ इन्चको डिजिटल इन्स्ट्रयुमेन्ट प्यानल र हेड अप डिस्प्ले लगायत फिचर पाउन सकिन्छ । चिनियाँ बजारमा यसको मूल्य २७ हजार ६०० देखी ३० हजार ४०० डलरसम्म निर्धारण गरिएको छ ।