तीन वर्ष पश्चात नाडा अटो शो आगामी भदौमा हुने

काठमाडौं– तीन वर्ष पश्चात सवारी साधनको कुम्भ मेला मानिने नाडा अटो शो आगामी भदौमा हुने भएको छ । कोरोना महामारी र आयात प्रतिबन्धले तीन वर्षदेखि हुन नसेकेको नाडा अटो शो आगामी भदौमा गरिने भएको हो ।

आयोजक नाडा अटोमोबाइल्स एसोसिएसन अफ नेपालले आगामी भदौं २६ गतेदेखि असोज १ गतेसम्म नाडा अटो शो आयोजना गर्ने जानकारी दिएको छ ।

कोरोना महामारीका कारण यो भन्दा पहिले नाडा अटो शो हुन सकेको थिएन । गत वर्ष शो हुने तयारी गरिए पनि आयात प्रतिबन्धका कारण सवारी साधनमा आकर्षण नभएकाले अन्तिममा रोकिएको थियो । यद्यपि गत वर्ष इलेक्ट्रिक सवारी साधनको छुट्टै शो ‘नाडा ईभी अटो शो’ आयोजना गरिएको थियो ।

नाडा अटो शोमा ईभी लगायतका नयाँ सवारी साधनका साथै कम्पोनेन्ट र यससँग सम्बन्धित एसेसरिज लगायत विभिन्न संस्थाहरुको सहभागिता रहने छ । त्यसैगरी नेपालमा उत्पादन भएका सवारी साधन समेत विशेष प्राथमिकताका साथ प्रदर्शन गरिने छ ।