नाडा अटो शो २०२३ मा १२० स्टल र ब्लक रहने, चार पांग्रे १६ र दुई पांग्रे २२ ब्रान्ड सहभागी हुने

काठमाडौं – आगामी भाद्र २६ देखि ३१ सम्म काठमाडौंको भृकुटीमण्डपमा हुने नाडा अटो शो २०२३ मा ठूला तथा साना गरी करिव १२० स्टल र ब्लकहरु रहने भएका छन् ।

उक्त प्रदर्शनीमा प्रख्यात अन्तर्राष्ट्रिय ब्रान्डका सवारी साधन, लुब्रिकेन्ट, टायर, पार्टपुर्जाका साथै राष्ट्रिय ब्रान्डका अटो सामग्री उत्पादक एवं वस्तु तथा सेवा प्रदायकहरुको सहभागिता रहने छ ।

नाडा अटोमोबाइल्स एसोसिएसन अफ नेपालद्वारा आयोजित कार्यक्रममा यस सम्बन्धी जानकारी प्रदान गरिएको हो । प्रदर्शनीमा चार पांग्रे १६ र दुई पांग्रे २२ ब्रान्डको सहभागिता रहने छ ।

त्यसैगरी ७ ब्रान्डका लाइट कमर्सियल भेइकल, ९ वित्तीय संस्था तथा ३० लुब्रिकेन्ट, टायर, ब्याट्री, पार्टपुर्जा एवं ग्यारेज उपकरण कम्पनीहरुको सहभागिता रहने छ ।

सो अवसरमा प्रदर्शनीलाई बढी जानकारीमूलक बनाउन वित्तीय सेवा, बिक्री पछिको सेवा आदि उपलब्ध गराउने संस्थाका साथै अटोमोबाइल सम्बन्धी म्यागेजिन र पत्रपत्रिकाहरुका लागि समेत एउटा छुट्टै मिडिया स्टल रहने छ ।

आम सर्वसाधारणलाई ट्राफिक नियम तथा सडक सुरक्षा सम्बन्धी जानकारी दिन ट्राफिक प्रहरी महाशाखा, काठमाडौंको सूचना कक्ष समेत प्रदर्शनीमा रहने छ ।

नाडा अध्यक्ष ध्रुव थापाले यस पटकको अटो शोलाई थप व्यवस्थित बनाइने बताए । महानगर यातायातको सहयोगमा निःशुल्क सटल बसको व्यवस्था र अन्य विभिन्न सुविधा समेत उपलब्ध हुने उनले जानकारी दिए ।

नाडा अटो शो २०२३ समिति सभापति अनुप कुमार बरालले अटो क्षेत्र चलायमान नभएको बेलामा पनि प्रदर्शनीमा विभिन्न अटोमोबाइल कम्पनीहरुको उत्साहजनक सहभागिताले केही हदसम्म अर्थतन्त्र चलायमान बनाउन मेलाले सहज बनाउने बताए ।

नाडा अटो शो २०२३ को शीर्ष प्रायोजक टाटा मोटर्स जेन्युइन आयल रहेको छ भने सह–प्रायोजकमा शिखर इन्स्योरेन्स कम्पनी रहेको छ ।

यसैगरी प्रदर्शनीको डोर प्राइजमा याडिया, टिकेटिङ पार्टनरमा खल्ती, अफिसियल इन्टरनेट पार्टनरमा वर्ल्डलिंक, फायर सेफ्टी सपोर्टमा हिट्को प्रालि तथा हस्पिटल पार्टनरमा फ्रन्टलाइन हस्पिटल रहेको छ ।

आगामी भाद्र २५ सम्म अग्रिम अनलाइन टिकट खरिदमा खल्तीले २० प्रतिशत क्यासब्याकको व्यवस्था समेत गरेको छ । टिकट किन्नेहरुका बीचमा लक्की ड्र गरी एक जनाले याडिया ई८एस प्रो इलेक्ट्रिक स्कुटर जित्न सकिने व्यवस्था समेत रहेको छ । सर्वसाधारणका लागि टिकटको मूल्य २ सय रुपैयाँ रहेको छ भने विद्यार्थीका लागि १५० रुपैयाँ रहेको छ ।

पहिले देखि नै रोकिएको र नेपालीहरुको महान चाडपर्वको पूर्व सन्ध्यामा हुने अटो शोमा करिव ७५ हजार अवलोकनकर्ता हुने आयोजकको अनुमान छ । प्रदर्शनीको व्यवस्थापन ग्लोबल एक्सपोजिसन एन्ड म्यानेजमेन्ट सर्भिसेजले गरिरहेको छ ।