मोटरसाइकल वा स्कुटर ? पहिलो पटक किन्न चाहनेका लागि कुन उपयुक्त ?

पहिलो पटक दुई पाङ्ग्रे सवारी साधन किन्न लागेका मानिसहरूका लागि ठूलो प्रश्न हुन्छ—मोटरसाइकल किन्ने कि स्कुटर ? यो निर्णयमा धेरै लामो समय अल्झिन्छन् । नेपालमा मात्र हरेक महिना हजारौं मानिसहरू बाइक र स्कुटरबीचको छनोटमा अन्योलमा पर्ने गरेको तथ्यांक छ ।

मोटरसाइकलको लोकप्रियता उच्च छ । १०० सीसीदेखि १५० सीसीसम्मका मोटरसाइकलहरू बढी बिक्री हुने खण्डमा पर्छ । हिरो, होन्डा, बजाज, यामाहा र टीभीएस जस्ता कम्पनीका बाइकहरू विशेष मागमा छन्। प्रायः युवा पुस्ता, कलेज जाने विद्यार्थीदेखि लिएर रोजगारीका लागि मोटरसाइकल रोज्ने गरेको पाइन्छ ।

मोटरसाइकल लामो दूरीको यात्रा गर्न उपयुक्त हुन्छ । स्कुटरको तुलनामा बढी आरामदायी, ठूलो इन्धन ट्याङ्की भएको कारण एक पटकको रिफ्युलिङमै लामो यात्रा सम्भव हुन्छ । फिचर र सेफ्टीको हिसाबले पनि मोटरसाइकल राम्रो मानिन्छ ।

तर स्कुटरको उपयोगिता फरक ढंगको हुन्छ । नयाँ प्रयोगकर्ताका लागि स्कुटर चलाउन सजिलो हुन्छ । हलुका तौल र सिटमुनि भण्डारण हुने सुविधा यसका मुख्य विशेषता हुन् । दैनिक अफिस जान, किनमेल गर्न वा छोटो दूरीमा सामान बोकेर यात्रा गर्न स्कुटर उपयुक्त मानिन्छ । महिलाहरूले स्कुटरलाई बढी रोज्ने गरेका छन्, जसमा सजिलै सामान राख्न सकिने र छोटो दूरीका लागि चलाउन सहज हुने भएकाले यो घरपरिवारमै बढी प्रयोग हुने साधन बनेको छ ।

मोटरसाइकल र स्कुटर दुवैका आफ्नै विशेष फाइदा र उपयोग छ । लामो दूरी र नियमित यात्रा गर्नेको लागि मोटरसाइकल उत्तम मानिन्छ भने दैनिक काम, सजिलो सञ्चालन र सामान बोक्ने आवश्यकताका लागि स्कुटर बढी उपयोगी देखिन्छ ।