चीनका टप १० ब्रान्डमध्ये अधिकांश ब्रान्डको नेपालमा कारोबार, बन्दै चाइनिज गाडी हब

पछिल्लो समय नेपाली बजारमा चिनियाँ ब्रान्डका प्यासेन्जर कार भित्रिने क्रम बढिरहेको छ । साउन महिनाभित्र मात्र चीनका प्रख्यात ३ अटोमोबाइल ब्रान्ड नेपाल प्रवेश गरे । चीनको प्रख्यात ब्रान्ड चाङ्गन, ग्रेटवाल र चेरी नेपाल भित्रिएका हुन् । यी तीनवटै ब्रान्डलाई नेपालको अटोमोबाइल व्यवसायमा स्थापित कम्पनी एमएडब्लु ग्रुप, विशाल ग्रुप र शारडा ग्रुपले भित्र्याएको हो ।

अटोमोबाइल व्यवसायको विस्तारमा आक्रामक बन्दै गएका यी ३ ग्रुपको रोजाइमा चिनियाँ ब्रान्ड परेपछि अहिले अन्य व्यावसायिक घरानामा समेत यो चासोको विषय बनेको छ । यसअघि एमजी, डीएफएसके, जेएसी र फोटोन ब्रान्डका सवारीसाधन नेपाल भित्रिइसकेका छन् ।

नेपाल भित्रिएका यी सबै ब्रान्ड चीनको टप १० ब्रान्डमा सुचिकृत अटोमोबाइल कम्पनीका उत्पादन हुन् । एमएडब्लु ग्रुपले भित्र्याएको चाङ्गन चीनमा सर्बाधिक बिक्री हुने प्यासेन्जर कार हो । त्यसैगरी सोही ग्रुपले बिक्री गर्दै आइरहेको फोटोन समेत चीनको टप १० अटोमोबाइल कम्पनीमा सामेल हुन सफल बेइजिङ अटोमोटिभ इन्डस्ट्री होल्डिङ कम्पनी अन्तर्गतको उत्पादन हो । यो कम्पनीले चीनमा हुन्डाई र मर्सिडिज बेन्जजस्ता विश्वप्रख्यात अटोमोबाइल ब्रान्डसँग सहकार्य गर्दै आइरहेको छ । फोटोन कमर्सियल भेइकलका क्षेत्रमा चीनकै कहलिएको ब्रान्ड समेत हो ।

चीनको दोस्रो ठूलो अटो उत्पादक सांघाई अटोमोटिभ इन्डस्ट्री कर्पोरेसनले उत्पादन गर्ने एमजी ब्रान्डका सवारी साधनलाई पारामाउन्ट मोटर्सले आयात गरी कारोबार गरिरहेको छ । ब्रिटिश ब्रान्ड भए पनि हाल यो चाइनिज कम्पनीको स्वामित्वमा छ । पारामाउन्टमा विशाल ग्रुप र मुरारका अर्गनाइजेसनका सञ्चालक संलग्न छन् ।

त्यसैगरी चीनको चौथो ठूलो अटो उत्पादक डोङफेङ मोटरको उत्पादन डीएफएसके विगत २ वर्षयता कारोबार हुँदै आइरहेको छ । यो ब्रान्डलाई कुजु नेपालले आयात गरी कारोबार थालेको हो । यो कम्पनी अटोमोबाइल व्यवसायमा नयाँ नाम भएपनि छोटो समयावधिमा राम्रो कारोबार गर्न सफल सावित भएको छ ।

फक्सवागन, रेनो, एमजी र माज्दा गाडीको कारोबार गर्दै आइरहेको विशाल ग्रुपले अर्को चर्चित ब्रान्ड ग्रेटवाल भित्र्याएर चिनियाँ ब्रान्डको बजार प्रवद्र्धनमा होमिएको छ । यसैगरी यसअघि निसान र ड्याट्सन गाडीको कारोबार गर्दै आइरहेको शारडा ग्रुपले चेरी भित्र्याएर एकाएक चर्चामा आएको छ । ग्रेटवाल र चेरी दुबै चीनका टप १० अटो उत्पादकका उत्पादन हुन् ।

टप १० सूचीमा पर्न सफल जेएसी ब्रान्डको पिकअप समेत नेपाल भित्रिएको छ । यो पिकअपलाई जेएसी मोटर्स नेपालले भित्र्याएको हो । यो चीनको नम्वर वान कमर्सियल भेइकल रहेको दाबी गरिएको छ ।

साख एन्ड कम्पनीले बीएआईसीको बीजे ४० प्लस अफरोड गाडी नेपाल ल्याउने तयारी गरेको समाचार पहिले नै सार्वजनिक भइसकेको थियो । यसको लागि सम्पूर्ण तयारी पूरा भएको कम्पनीको भनाइ छ ।

नेपाली बजारमा उपलब्ध इलेक्ट्रिक कार मध्ये बीवाईडी पनि निकै लोकप्रिय छ । राष्ट्रपति र उर्जा मन्त्री समेतले चढ्ने बीवाईडीका इलेक्ट्रिक गाडी नेपाली बजारमा लोकप्रिय छन् । साइमेक्स इंकले बीवाईडीका गाडी नेपाली बजारमा बिक्री–वितरण गरिरहेको छ ।

टप १० ब्रान्डमा सामेल ब्रान्डमध्ये अब चीनबाट आयात हुन जिली, एफएडब्लु, एक्सपेङ, सिनो ट्रक जस्ता ब्रान्ड मात्र बाँकी रहेका छन् । यी ब्रान्डसमेत अबको केही समयभित्र नेपाल भित्रिसक्ने अनुमान लगाउन सकिन्छ ।

सन् २०२० को सेल्स भोल्युम अनुसार सबैभन्दा बढी कार बिक्री गर्न सफल ब्रान्डको रुपमा पहिलो नम्बरमा एसएआईसी मोटरकर्प रहेको छ । यो ग्रुपले २० लाख ५३ हजार युनिट गाडी बिक्री गरेको थियो । त्यसैगरी टप १० मा क्रमशः चाङ्गन अटोमोबाइल, झेजियाङ जिली होल्डिङ ग्रुप, डोङफेङ मोटर, ग्रेटवाल मोटर्स, बीएआईसी ग्रुप, एफएडब्लु ग्रुप, चेरी अटोमोबाइल, सिनो ट्रक र जेएसी ग्रुप रहेका थिए ।

त्यसैगरी गत वर्ष प्रकाशित सूची अनुसार बजार पुँजीकरणको आधारमा सबैभन्दा ठूलो अटोमोबाइल कम्पनी बीवाईडी हो । त्यसैगरी दोस्रो देखि दशौं नम्बर सम्म क्रमशः एसएआईसी मोटर्स, नियो, जिली, ग्रेटवाल मोटर्स, एक्सपेङ मोटर्स, जीएसी ग्रुप, लि अटो, एफएडब्लु ग्रुप र चाङ्गन अटोमोबाइल रहेका छन् ।