अब जेडएस ईभी लङ रेन्जको मूल्य १० लाख कम

काठमाडौं – नेपाली बजारमा एमजी मोटर्सका इलेक्ट्रिक सवारी साधन बिक्री–वितरण गरिरहेको पारामाउन्ट मोटर्सले एमजी जेडएस ईभीको लङ रेन्जको मूल्य १० लाख रुपैयाँले घटाएको छ ।

पहिले यो गाडीको मूल्य ८१ लाख ९९ हजार रुपैयाँ भएकोमा अब यसको मूल्य ७१ लाख ९९ हजार रुपैयाँ मात्र हुनेछ ।

सरकारले गत जेठ १५ गते सार्वजनिक गरेको आर्थिक विधेयकमा १०० किलोवाटदेखि २०० किलोवाट क्षमताका मोटर जडान भएका ईभीमा १० प्रतिशत भन्सार र १० प्रतिशत अन्तःशुल्क घटाएसँगै लङ रेन्ज जेडएस ईभीको मूल्य घटेको हो ।

अन्य सबै फिचर समान रहेको ९९ किलोवाटको जेडएस ईभीको तुलनामा लङ रेन्जमा ब्याट्री साइजसँगै मोटर साइज पनि ठूलो छ । लङ रेन्ज मोडलमा ११५ किलोवाट क्षमताको मोटर छ भने अर्कोमा ९९ किलोवाटको मात्रै मोटर दिइएको छ ।

लङ रेन्ज एमजी जेडएस ईभीमा ७२.६ किलोवाट ब्याट्री छ, जसको रेन्ज ४४० किलोमिटर हुनेछ । सो गाडीको ग्राउन्ड क्लियरेन्स १७५ एमएम छ ।

यसको इन्टेरियरमा १०.१ इन्चको टचस्क्रिन इन्फोटेनमेन्ट सिस्टम र ७ इन्चको डिजिटल ड्राइभर डिस्प्ले रहेको छ । यसका साथै रोटरी डायल गियर नब, ड्राइभिङ मोड र ब्रेकिङ रिजेनेरेसन रहेको छ । यसमा हेडल्याम्प, इन्टिग्रेटेड एलईडी डीआरएल, एलईडी टेलल्याम्प आदि छन् ।

यो गाडीमा एमजी पाइलट नाम दिइएको अटोमेटिक इमर्जेन्सी ब्रेकिङ सहितको एड्भान्स्ड ड्राइभर असिस्टेन्स सिस्टम रहेकोले निकै नै सुरक्षित मानिएको छ । यसमा १३० एचपीको पावर र २८० एनएमको टर्क भएको पर्मानेन्ट म्याग्नेट सिंक्रोनस मोटर रहेको छ ।

यो गाडी ८.५ सेकेन्डमा १०० किलोमिटर प्रतिघण्टाको गतिमा गुड्न सक्छ । एमजीको ग्लोबल डिजाइन भएको यो गाडीमा पानोरामिक सनरुफ, १७ इन्चको डायमन्ड कट अलोय ह्विल र २.५ को पीएम फिल्टर लगायतका धेरै सुविधा रहेका छन् ।

एमजी जेडएस ईभी २०२२ मा पावर्ड ड्राइभर सिट, अटोमेटिक हेडलाइट र वाइपर, कनेक्टेड कार टेक्नोलोजी, ६ वटा एयरब्याग, हिल स्टार्ट, हिल डिसेन्ट कन्ट्रोल, अल ह्विल डिस्क ब्रेक, टायर प्रेसर मोनिटरिङ सिस्टम, अडेप्टिभ क्रुज कन्ट्रोल, लेन किप असिस्ट र ३६० डिग्री क्यामेरा जस्ता विभिन्न फिचर उपलब्ध छन् ।