एमजीले अब साना र सस्ता ईभीको उत्पादनमा जोड दिने, कम्प्याक्ट एसयूभी र ह्याचब्याक आउन सक्ने

अघिल्लो बर्ष भारतीय बजारमा एमजी जेडस ईभीलाई उतारेर चर्चामा आएको एमजी मोटर्सले विस्तारै कम मूल्यका कम्प्याक्ट एसयूभी र साना ह्याचब्याक ईभीको समेत उत्पादन गर्दै जाने योजना बनाएको छ । हाल एमजी जेडएस ईभीको मूल्य भारतीय बजारमा २१ देखि २४ लाख भारुसम्म कायम गरिएकोमा कम्पनीले निकट भविष्यमै २० लाख भन्दा कम मूल्यमा नयाँ एसयूभी उतार्ने योजना बनाएको छ ।

विस्तारै १० लाख मूल्यको हाराहारीमै खरिद गर्न सकिने साना एसयूभी र ह्याचब्याक समेत उत्पादन गर्ने कम्पनीको योजना छ । नयाँ ईभीलाई उसले चिनियाँ बजारमा हाल चर्चा कमाइरहेको प्यारेन्ट कम्पनी बीएआईसीको बाओजन ई२०० प्लेटफर्ममा उत्पादन गरिने बताइएको छ । यसलाई गत वर्षको अटो एक्सपोमा सार्वजनिक गरिएको थियो । आगामी वर्षहरुमा वार्षिक २० हजार हराहारी ईभी बिक्री गर्ने महत्वाकांक्षी योजना समेत कम्पनीले बनाएको छ ।

भारतीय बजारमा टाटा नेक्सन ईभीको लोकप्रियता चुलिँदै गएको अवस्थालाई मध्यनजर गर्दै उसलाई टक्कर दिने गरी नयाँ जेडएस ईभीभन्दा केही सानो एसयूभी सार्वजनिक गरिने कम्पनीले बताएको छ । नाम सार्वजनिक नगरिएको उक्त एसयूभीले ४१९ किलोमिटर रेन्ज प्रदान गर्नेछ । यो एसयूभीमा ४४.५ किलोवाट आवरको ब्याट्री प्याक उपलब्ध हुनेछ । भारतीय बजारलाई मध्यनजर गर्दै नयाँ गाडीको पर्फमेन्स, डिजाइन र ग्राउन्ड क्लियरेन्समा विशेष ध्यान दिइने समेत कम्पनीको भनाइ छ ।

एमजीले बिस्तारै बजेट ईभीमा जोड दिने र सन् २०२४ पछि साना र सस्ता कारको उत्पादनमा ध्यान केन्द्रित गर्दै जाने उद्घोष गरेको छ । सन् २०२४ पछि बार्षिक २० हजार बढी यस्ता ईभी बिक्री गर्ने एमजीको योजना छ ।