एमजीले अर्को वर्ष इलेक्ट्रिक ह्याचब्याक ल्याउने

वुलिङ एयर इलेक्ट्रिक कार आधिकारिक रूपमा इन्डोनेसियाली बजारमा यो महिना लन्च गरिएको छ । यो नयाँ माइक्रो कार होंगगुआंग मिनी ईभीमा आधारित छ । यो सानो इलेक्ट्रिक कार निकट भविष्यमा सिस्टर ब्रान्ड एमजी मार्फत भारतीय बजारमा लन्च गर्ने सम्भावना रहेको छ । नेपालमा पनि यो आउन सक्छ ।

वुलिङ एयर इलेक्ट्रिक कार सानो कार हो, जसको लम्बाई २९७४ एमएम, चौडाई १५०५ एमएम, उचाई १६३१ एमएम र ह्विलबेस २०१० एमएम छ । यो कार ३ वटा ढोका भएको ह्याचब्याकको रूपमा उपलब्ध छ, जसमा ४ जना बस्न सकिन्छ ।

भारतमा लन्च गर्नु अघि एमजी वुलिङ एयर ईभीमा केही परिवर्तन हुने सम्भावना छ । यसमा एसी र ब्याट्री थर्मल म्यानेजमेन्ट सिस्टम थप शक्तिशाली हुनेछ । अन्य फिचरमा पनि केही परिवर्तन देख्न सकिनेछ ।

एमजीको आगामी ईभीमा २० केडब्ल्युएच देखि २५ केडब्ल्युएचको ब्याट्री क्षमता हुने अपेक्षा गरिएको छ, जसले लगभग १५० किमी देखि २०० किमीको ड्राइभिङ रेन्ज प्रदान गर्नेछ । सानो ह्याचब्याक ४० पीएसको पिक पावरको साथ रियर एक्सलमा सिंगल इलेक्ट्रिक मोटरद्वारा संचालित हुनेछ ।

भारतीय बजारमा लन्चिङ पछि सो ईभीको मूल्य १० लाख भन्दा थोरै महँगो हुने अनुमान गरिएको छ । एमजीले यो आगामी इलेक्ट्रिक ह्याचब्याक २०२३ अटो एक्सपोमा प्रदर्शन गर्नेछ र यसको लन्च सोही वर्षमा हुनेछ ।