३ लाख ६८ हजार सम्मले घट्यो भारतमा एमजी जेडएस इभीको मूल्य

एमजीले भारतमा जेडएस इभीको मूल्य भारी मात्राले कम गरेको छ । एमजी मोटर्स स्थापनाको १०० वर्ष अवसर पारेर कम्पनीले जेडएस ईभीमा एकैपटक २ लाख ३० हजार भारु(नेरु ३ लाख ६८ हजार) सम्म कम गरेको हो । एमजीले यसअघि हेक्टर र हेक्टर प्लस एसयूभीमा समेत मूल्य कम गरेको थियो ।

जोडएस ईभी भारतमा एक्साइट, एक्सक्लुलिस र एक्सक्लुसिभ प्रो गरी कुल तीन भेरिएन्टमा उपलब्ध रहँदै आएको छ । जसमध्ये एक्साइटमा ५० हजार, एक्सक्लुसिभमा २ लाख ३० हजार र एक्सक्लुसिभ प्रोमा २ लाख भारु कम गरिएको हो । उत्पादन लागत कम हुँदै गएका कारण मूल्य घटाउन सकिएको कम्पनीले जनाएको छ । यो ईभीको मूल्य भारतमा २२ लाख ८० हजारदेखी २५ लाख ९० हजार भारुसम्म कायम गरिएको छ ।

भारतमा बिक्री हुने जेडएस ईभीमा कम्पनीले ५०.३ किलोवाट आवरको ब्याट्री प्याक जडान गरेको छ । यसमा दिइएको फ्रन्ट–एक्सल–माउन्टेड पीएमएस मोटरले १७७ एचपी पावर र २८० एनएम टर्क जेनेरेट गर्छ । यसलाई एकपटप फुल चार्ज गर्दा ४६१ किलोमिटर रेन्ज पाउन सकिने कम्पनीले दावी गरेको छ । ५० किलोवाट डिसी फस्ट चार्जर सपोर्ट गर्ने यो एसयूभीलाई ७.४ किलोवाट चार्जरले ९ घन्टासम्ममा फुल चार्ज गर्न सकिन्छ ।

एमजीले यसमा ३६० डिग्री क्यामेरा, पानारोमिक सनरुफ, १०.१ इन्चको टचस्क्रिन, वायरलेस चार्जर, ७ इन्चको डिजिटल इन्स्ट्रयुमेन्ट क्लस्टर र कनेक्टेड कार टेक्नोलोजी जस्ता फिचर दिएको छ । सेफ्टि फिचर अन्तर्गत यसमा एडिएएस, ६ वटा एयरब्याग, ईबीडी सहितको एविएस, इलेक्ट्रोनिक स्ट्याविलीटी कन्ट्रोल र हील डिसेन्ट कन्ट्रोल लगायत पाउन सकिन्छ ।