एमजी मोटर्सको नयाँ एसयूभी भारतीय बजारमा विन्ड्सरको नामले लन्च गरिने

एमजी मोटर्सले आगामी अल इलेक्ट्रिक क्रसओभर ईभी भारतीय बजारमा एमजी विन्ड्सर ईभीको नाममा लन्च गरिने पुष्टि गरेको छ । यो कम्पनीको तेस्रो इलेक्ट्रिक एसयूभी हुनेछ ।

एमजी विन्ड्सर ईभीलाई अन्तर्राष्ट्रिय बजारमा क्लाउड ईभीको नामले चिनिन्छ । सो इलेक्ट्रिक कारको एक्सटेरियर डिजाइन क्रसओभर शैलीमा छ । यसको दुबै छेउमा चार्जिङ इनलेट, स्लिक हेडलाइट युनिट, चारैतिर क्यामेरा र १८ इन्च अलोय ह्विल समावेश छ ।

एमजी विन्ड्सर ईभीमा सोफा जस्तो सिट, फ्ल्याट फोल्डिङ फ्रन्ट सिट र क्लाइमेट कन्ट्रोलको विकल्प रहेको छ । क्याबिनमा ठुलो इन्फोटेनमेन्ट स्क्रिन, एम्बियन्ट लाइटिङ र ठुलो स्टोरेजको विकल्प पनि रहेको छ । भारतीय बजारको लागि डिजाइन गरिएको विन्ड्सर ईभीमा पनि यी फिचर समावेश हुने अपेक्षा गरिएको छ ।

अन्तर्राष्ट्रिय बजारमा उपलब्ध सो इलेक्ट्रिक एमयूभी दुई वटा ब्याट्री प्याकमा उपलब्ध छ । यसमा ४६० किलोमिटरको रेन्ज दिने ५०.६ किलोवाटको ब्याट्री र ३६० किलोमिटरको रेन्ज दिने ३७.९ किलोवाटको ब्याट्री प्याक समावेश छ ।

रिपोर्टका अनुसार भारतीय बजारमा लन्च गर्न लागेको एसयूभीमा ३६० किलोमिटर रेन्ज दिने ब्याट्री प्याक हुने अनुमान गरिएको छ ।

भारतीय वा नेपाली बजार र अन्य विश्व बजारमा विभिन्न कम्पनीहरुले फरक फरक नाममा सवारी साधन बिक्री–वितरण गर्ने गरेका छन् । एमजीले पनि कुनै मोडलमा यस्तै गर्ने गरेको छ ।