एमजीले ३ मिटर भन्दा सानो इलेक्ट्रिक कार लन्च गर्दै

एमजी मोटर्सले भारतीय बजारका लागि सस्तो इलेक्ट्रिक कार ई२३० सार्वजनिक गरेको छ । मिडिया रिपोर्टका अनुसार एमजीको सो नयाँ इलेक्ट्रिक कार सानो २ ढोकाको इलेक्ट्रिक कार हुन सक्नेछ । यो विशेषगरी शहरी क्षेत्रको लागि केन्द्रित हुनेछ । कम्पनीले यो इलेक्ट्रिक कार आगामी वर्ष भारतमा लन्च गर्नुका साथै निर्यात पनि गरिने जानकारी दिएको छ ।

एमजी ई२३० एमजी मोटर्सको मुख्य कम्पनी एसएआईसीको विलिङ्ग ह्वाङग्वाङ इलेक्ट्रिक कार हो । यो सानो साइजको इलेक्ट्रिक कारलाई चीनमा निकै रुचाइएको छ । चीन बाहिर यो एमजी ई२३० नाममा बिक्री गरिन्छ । यो इलेक्ट्रिक कार ३ मिटर भन्दा सानो छ । यसको लम्बाई २९१७ एमएम, उचाई १६२१ एमएम र चौडाइ १४९३ एमएम छ ।

भारतमा लन्च गरिने एमजी ई२३० कारमा ४ जना सिट क्षमता हुने अपेक्षा गरिएको छ । यसमा २० किलोवाटको ब्याट्री प्याकसँगै २० किलोवाटको इलेक्ट्रिक मोटर पनि दिने अनुमान गरिएको छ । यो कार फुल चार्जमा १५० किलोमिटरको ड्राइभिङ रेन्ज प्रदान गर्न सक्षम हुनेछ ।

रिपोर्टका अनुसार एमजी ई२३० मा एबीएस, ईबीडी, रियर पार्किङ सेन्सर, एड्भान्स ड्राइभर असिस्टेन्स सिस्टम, इन्टरनेट अफ भेइकल, अटोमेटिक पार्किङ, भ्वाइस कमाण्ड र ड्युअल फ्रन्ट एयरब्याग जस्ता फिचरहरू दिने सम्भावना छ । यो इलेक्ट्रिक कारले ५ सेकेन्डमा ०–६० किलोमिटर प्रतिघन्टाको गति लिन सक्नेछ, जसको टर्क १७० एनएम हुनेछ र यसमा मल्टि–ड्राइभ मोडहरू पनि दिइनेछ ।

कम्पनीले सो एमजी ई२३० को मूल्यको बारेमा आधिकारिक जानकारी दिएको छैन । एमजीको नयाँ इलेक्ट्रिक कारले ड्याटसन रेडी गो र मारुती सुजुकी अल्टोसँग प्रतिस्पर्धा गर्नेछ ।

भविष्यमा यस्तो कार नेपाली बजारमा पनि आउने अपेक्षा गर्न सकिन्छ ।