एमजी कोमेटको मूल्य १ लाख ४० हजार भारु घट्यो, नेपालमा ३ लाखसम्म सस्तो हुने

एमजीको इन्ट्रि लेबल ईभी कोमेट १ लाख ४० हजार भारुसम्मले सस्तो भएको छ । कम्पनीले भारतमा यसको मूल्य ९९ हजार देखी १ लाख ४० हजार भारुसम्म कम गरेको हो । मूल्य घटेपछि यसको टप स्पेक भेरिएन्ट प्रतिस्पर्धी टाटा टियागो ईभीको बेस भेरिएन्ट भन्दा पनि सस्तो भएको छ ।

कोमेटलाई एमजीले पेस, प्ले र प्लस गरी कुल तीन भेरिएन्टमा उपलब्ध गराउँदै आएको छ । यी तीन भेरिएन्टको मूल्य यसअघि क्रमशः ७ लाख ९८ हजार, ९ लाख २८ हजार र ९ लाख ९८ हजार भारु निर्धारण गरिएको थियो । कोमेटको नयाँ मूल्य क्रमशः ६ लाख ९९ हजार, ७ लाख ८८ हजार र ८ लाख ५८ हजार भारु तोकिएको छ । पेसमा ९९ हजार तथा प्ले र प्लस भेरिएन्टमा १ लाख ४० हजार भारुका दरले मूल्य कम गरिएको हो ।

कोमेट इभीमा एमजीले १७.३ किलोवाट आवरको ब्याट्री प्याक र ३० किलोवाट क्षमताको पिएमएसएम मोटर दिएको छ । यो माइक्रो ईभीले एकपटकको सिंगल चार्जमा २३० किलोमिटर रेन्ज दिने दावी गरिएको छ । कोमेट नेपाली बजारमा समेत बिक्री हुँदै आएको मिनी ईभी हो ।

नेपालमा यसको पेस र प्ले भेरिएन्टमात्र उपलब्ध छ । नेपालका लागि आधिकारिक वितरक पारामाउन्ट मोटर्सले यसको पेस भेरिएन्टलाई १८ लाख र प्लेलाई २१ लाखमा बिक्री गर्दै आएको छ । भारतमा घटेको मूल्यलाई आधार मान्दा नेपालमा पनि यो ईभी ३ लाख सम्मले सस्तो पर्ने अनुमान गर्न सकिन्छ ।