मर्सिडिज बेन्जले ल्यायो फ्युचरिस्टिक कन्सेप्ट सुपरकार, कारको उचाइ ११६८ एमएम मात्र

जर्मन लक्जरी कार निर्माता कम्पनी मर्सिडिज बेन्जले मर्सिडिज भिजन वान इलेभेन फ्युचरिस्टिक कन्सेप्ट सुपर कार सार्वजनिक गरेको छ । सो कन्सेप्ट सुपर कारलाई कम्पनीले क्यालिफोर्नियाको इन्टरनेसनल डिजाइन सेन्टरमा डिजाइन र विकास गरेको हो ।

मर्सिडिज बेन्ज भिजन वान इलेभेन २ सिटको इलेक्ट्रिक हाइपरकार कन्सेप्ट मोडल हो । यो सन् १९७० को दशकमा ल्याएको मर्सिडिज सी१११ कन्सेप्ट कारको अपडेट भर्सन हो ।

कम्पनीले सो कारको उचाई ११६८ एमएम मात्र छ । यसको ग्राउन्ड क्लियरेन्स एकदम कम छ, जसका कारण यो पूर्णतया जमिनमा टाँसिएको देखिन्छ ।

कम्पनीले कारको इन्टेरियरलाई पनि फ्युचरिस्टिक बनाएको छ । कारको क्याबिनमा कम्पनीले निकै ठूलो स्क्रिन दिएको छ । कारको इन्टेरियरमा सेतो, सुन्तला र सिल्भर कलर प्रयोग गरिएको छ । कारमा २ वटा ढोका पनि दिइएको छ ।

कम्पनीले यो कन्सेप्ट कार कहिले लन्च गर्ने भन्ने बारे आधिकारिक जानकारी दिइएको छैन । रिपोर्टका अनुसार कम्पनीले यस कारको डिजाइन र फिचर एएमजी इलेक्ट्रिक मोडलमा प्रयोग गर्ने सम्भावना छ ।