मारुती सुजुकीले आफ्नो ईभी उत्पादन दुई तिहाईले घटाउने, यस्तो छ कारण

अमेरिकासंग व्यापार युद्ध सुरु भएपछि चीनले लिएको एक निर्णयले विश्वका ठूला अटो उद्योगलाई चिन्ता थपिदिएको छ । दुर्लभ खनिजको निर्यातमा प्रतिबन्ध लगाउने चीनको निर्णयले विश्वव्यापी अटोमेकरहरूमा चिन्ता बढाएको हो ।

चीनको यस निर्णयको असर अमेरिकामा मात्र नभई भारतीय अटो क्षेत्रमा समेत पर्न थालिसकेको छ ।

रेयर अर्थ समेत भनिने यस प्रकारका खनिज पदार्थको निर्यातमा चीनले कडाई गरेपछि भारतको सबैभन्दा ठूलो अटो निर्माता मारुती सुजुकीले विद्युतीय सवारी साधन उत्पादनको लक्ष्य दुई तिहाइले घटाउने निर्णय गरेको छ ।

मारुती सुजुकीले यस वर्षको अन्त्यमा आफ्नो पहिलो विद्युतीय एसयुभी ई–भिटारा लन्च गर्ने योजना बनाएको छ । कार निर्माताले सुरुमा अप्रिल–सेप्टेम्बर अवधिका लागि २६ हजार ५०० युनिटको उत्पादन लक्ष्य राखिएकोमा अव यसलाई घटाएर ८ हजार २०० युनिटमा झार्ने निर्णय लिएको छ ।

आपूर्ति अवरोधका बाबजुद मारुतीले अझै पनि मार्च २०२६ सम्ममा ६७ हजार युनिट विद्युतीय सवारी साधन उत्पादन गर्ने लक्ष्य लिएको छ ।

यसैबीच, भारत सरकारले नयाँ सप्लाई चेनको विकास गर्ने रणनिती लिएको छ भने उसले यस विषयमा चिनियाँ अधिकारीहरूसँग पनि छलफल गरिरहेको मिडिया रिपोर्टमा उल्लेख गरिएको छ ।