मारुती सुजुकीले इलेक्ट्रिक सवारी साधनका लागि सस्तो ब्याट्री निर्माण गर्ने

इलेक्ट्रिक सवारी साधनको मूल्य त्यसमा जडान गरिने ब्याट्रीबाट निर्धारण हुन्छ । अन्य सवारी साधन भन्दा इलेक्ट्रिक सवारी साधन महँगो हुन्छ, जसले गर्दा यसको पहुँच सबैमा पुग्न सकेको छैन । यही कुरालाई ध्यानमा राख्दै मारुती सुजुकीले इलेक्ट्रिक सवारी साधनका लागि सस्तो ब्याट्री निर्माण गर्ने भएको छ ।

मारुतीका मार्केटिङ हेड सशांक श्रीवास्तवले इलेक्ट्रिक गाडीको मूल्य निकै उच्च रहेको र सामान्य कारको भाडा भन्दा ईभीको भाडा महँगो भएको जानकारी दिएका छन् । मारुतीले महँगो ब्याट्रीलाई कम मूल्यमा ल्याउने प्रयास गरिरहेको पनि जानकारी दिएका छन् ।

श्रीवास्तवले इलेक्ट्रिक सवारी साधनका लागि सस्तो ब्याट्री बनाउने तर कहिले बन्ने हो भन्न नसकिने बताए । साथै, २०३० सम्ममा मारुतीसँग विभिन्न सेगमेन्टमा ६ वटा ईभी हुनेछ । हाल एक प्रतिशत रहेको यो बजार २०२४–२५ मा करिब ३ प्रतिशत र २०३० मा १७ प्रतिशतले बढेर जाने कम्पनीको अनुमान छ ।

मारुतीले हालसम्म कुनै पनि इलेक्ट्रिक सवारी लन्च गरेको छैन । यद्यपि कम्पनीले जनवरी २०२३ मा भएको अटो एक्सपोमा पहिलो पटक इलेक्ट्रिक कारको कन्सेप्ट भर्सन सार्वजनिक गरेको थियो ।