नेपाली सडकमा देखियो मलेसियन कम्पनी प्रोटोनको एक्स५० कम्प्याक्ट एसयूभी

काठमाडौं – मलेसियन कार निर्माता कम्पनी प्रोटोनको कम्प्याक्ट एसयूभी एक्स५० काठमाडौंको सडकमा देखिएको छ । प्रोटोनको यो स्टाइलिस एसयूभीले नेपाली प्रिमियम कम्प्याक्ट सेगमेन्टको बजारमा एउटा नयाँ पहिचान कायम गर्ने विश्वास गरिएको छ ।

नेपालमा जगदम्बा मोटर्सले प्रोटोनका गाडीहरु बिक्री–वितरण गरिरहेको छ । जगदम्बा मोटर्सले औपचारिक रुपमा यो गाडी भित्र्याएको जानकारी सार्वजनिक गरेको छैन । यद्यपि स्रोतहरूका अनुसार प्रोटोन एक्स५० ४ संस्करणहरूमा आउँनेछ ।

यसमा १.५ लिटर टर्बोचार्ज्ड थ्री–सिलिन्डर र शीर्ष फ्ल्यागशिप भेरिएन्टमा टीजीडीआई (डायरेक्ट इन्जेक्सन) टर्बोचार्ज्ड थ्री–सिलिन्डर पेट्रोल हुनेछ । टीजीडीआई इन्जिनले १३० पीएस पावर र २५५ एनएम टर्कको संख्या बढाएर १५० पीएस अधिकतम पावर र २२६ एनएम टर्क उत्पादन गर्ने बताइएको छ ।

काठमाडौंको सडकहरूमा देखिएको प्रोटोन एक्स५० मा उन्नत चालक सहायता प्रणाली (एडीएएस० सहित सुविधाहरूको लामो सूची छ, जुन केही प्रिमियम निर्माताहरूमा मात्र देखिन्छ । प्रोटोन एक्स५० एसयूभी निर्माताको वेबसाइट अनुसार, यसमा एयरब्याग, ईबीए र बीएसँगै एबीएस, अटो हेडलाइट र वाइपरहरू, कीलेस इन्ट्री (अगाडि ढोका ह्यान्डलहरूमा सक्रिय टच सेन्सरहरू सहित), पुश– स्टार्ट, ३६० डिग्री क्यामेरा, ८ स्पिकर, ८ इन्च इन्फोटेनमेन्ट स्क्रिन, स्वायत्त आपतकालीन ब्रेकिङ, एडाप्टिभ क्रुज कन्ट्रोल, स्मार्ट एयर प्युरिफायर सिस्टमसहितको क्लाइमेट कन्ट्रोल, विद्युतीय रूपमा फोल्ड गर्न मिल्ने सिटहरू जस्ता उत्कृष्ट–इन–क्लास सुविधाहरू समावेश छन् ।

प्रोटोन एक्स५० पनि उपयोगी अटो पार्क सुविधाको साथ आउँदछ । यो एक सेल्फ–पार्किङ प्रणाली हो, जसले ड्राइभरलाई पार्किङ स्थलहरूमा सहज बनाउन मद्दत गर्छ । एक्स५० ले एसियन एनक्यापबाट पूर्ण रुपमा फाइभ स्टार सेफ्टी रेटिङ समेत प्राप्त गरेको छ ।

जगदम्बा मोटर्सले नेपालमा सन् २०२० देखि इन्ट्री लेवलको सेडान प्रोटोन सागा र प्रिमियम एसयूभी प्रोटोन एक्स७० समेत बिक्री गरिरहेको छ । बिक्री र बिक्री पतिको सेवा समेत उत्कृष्ट तरिकाले उपलब्ध गराएको दाबी गर्ने जगदम्बा मोटर्सले अब बजारमा उपलब्ध गराउने एक्स५० ले समेत नेपाली बजारमा राम्रो उपस्थिति जनाउने विश्वास गरेको बताएको छ ।