चर्चामा मेड इन नेपाल हुन्डाई भेन्यु : यस्तो छ बन्ने प्रक्रिया, मूल्यमा कति फरक ?

हुन्डाईको नेपालका लागि आधिकारिक वितरक लक्ष्मी इन्टरकन्टिनेन्टलले पहिले देखि नै नेपाली बजारमा कोरियाली कार निर्माता कम्पनी हुन्डाईका विभिन्न मोडलका गाडी बिक्री–वितरण गर्दै आएको छ । कम्पनीले भारतमा उत्पादन हुँदै आएका सवारी साधन नेपालमा बिक्री–वितरण गरिरहेको छ ।

तर हालै मात्र प्रधानमन्त्री पुुष्पकमल दाहाल ‘प्रचण्ड’ ले हुन्डाईको नवलपरासीमा रहेको एसेम्बली प्लान्टमा उत्पादन भएको पहिलो कार हुन्डाई भेन्यु सार्वजनिक गरेको समाचारले चर्चा पायो । यससँगै हुन्डाईले पनि यसलाई ‘मेड इन नेपाल हुन्डाई भेन्युु’ भनेर चर्चामा ल्याएको छ ।

धेरैले नेपालमा गाडी नै बन्दैन । किन मेड इन नेपाल भनेको ? भनेर प्रतिक्रिया दिइरहेका छन् । उनीहरुले केही पार्ट्स ल्याएर जोडजोड गरेकै भरमा मेड इन नेपाल भन्न मिल्दैन भन्ने तर्कहरु पनि गरिरहेका छन् ।

यसै सन्दर्भमा हुन्डाई नेपालले हुन्डाई गाडी उत्पादन गरिने नवलपरासीमा रहेको एसेम्बली प्लान्टको वारेमा सञ्चारकर्मीहरुलाई समेत जानकारी प्रदान गरेको छ ।

वास्तवमा हुन्डाईले नेपालमै पहिलो पटक सवारी साधन उत्पादन गर्नका लागि एसेम्बली प्लान्ट सञ्चालन गरेको छ । यो भन्दा पहिले धेरै वर्ष पहिले यस्तै एसेम्बली प्लान्टमार्फत हुलास मोटर्सले मुस्ताङ नामक गाडी नेपालमै उत्पादन गरेको थियो र केही वर्ष राम्रो व्यापार गर्न पनि सफल भएको थियो । तर विविध कारणले सो प्लान्ट बन्द भयो । अहिले भने चारपांग्रे सवारी साधन उत्पादन गर्नका लागि एक मात्र प्लान्ट हुुन्डाईले सञ्चालनमा ल्याएर फेरि चर्चित बनेको छ ।

पहिले देखि नै नेपाली बजारमा हुन्डाईका सवारी साधन उपलब्ध गराउदै आएको लक्ष्मी इन्टरकन्टिनेन्टल वास्तवमा लक्ष्मी ग्रुप अन्तर्गतको कम्पनी हो । अब नेपालमै सवारी साधन उत्पादन गर्ने लक्ष्यका साथ लक्ष्मी ग्रुपले लक्ष्मी मोटर कर्पोरेसनको स्थापना गरेको छ र सो प्लान्टको सञ्चालन लक्ष्मी मोटर्स कर्पोरेसनले नै गरिरहेको छ ।

विश्वका विभिन्न देशमा हुन्डाईल यस्ता एसेम्बलिङ प्लान्ट बनाएको छ । दक्षिण एसियाका बंगलादेश र श्रीलंकामा पनि हुन्डाईका यस्ता एसेम्बलिङ प्लान्ट छन् । तर ती प्लान्ट भन्दा नेपालको प्लान्ट अझै राम्रो भएको कम्पनीको दावी छ ।

यस्तो छ एसेम्बली प्लान्ट
नवलपरासीको परासीमा रहेको लक्ष्मी मोटर कर्पोरेसनद्वारा संचालित हुन्डाई भेइकल एसेम्बली प्लान्ट १० बिघा क्षेत्रफलमा फैलिएको छ । वार्षिक ५ हजार कार उत्पादन गर्ने क्षमता भएको सो प्लान्टमा हाल एसेम्बली सप र टेस्ट लाइनको कार्य भइरहेको छ ।

कुनै पनि सवारी साधन उत्पादन गर्नका लागि पाँच चरण पुरा गर्नुुपर्छ । ती पाँच चरण मध्ये पहिलो चरण प्रेस सप अर्थात स्ट्याम्पिङ, दोस्रो चरण बडी सप अर्थात वेल्डिङ र तेस्रो चरण पेन्ट सप हो । पहिलो चरणमा स्ट्याम्पिङ गरेर आवश्यक पार्ट्स तयार गरे पछि त्यसलाई जोड्ने अर्थात वेल्डिङ कार्य गरिन्छ । त्यसैगरी तेस्रो चरणमा पेन्ट सप अर्थात पेन्टिङ कार्य गरिन्छ ।

चौथो चरणमा एसेम्बली सप र पाँचौ चरणमा टेस्ट लाइन कार्य हुन्छ । नेपालमा हाल यही चौथो र पाँचौ चरणको कार्य हुने गरेको छ । कोरिया र भारतमा पहिलो तीन चरण पार गरेर ल्याइएका इन्जिन, बडी र विभिन्न पार्ट्सलाई एसेम्बल गर्ने र अन्तिममा टेस्ट गर्ने कार्य यहाँ हुने गरेको छ ।

यसका लागि प्लान्ट भित्र मेन एसेम्बली लाइन, सब एसेम्बली लाइन, टेस्ट लाइन, १.१ किलोमिटर लामो रोड टेस्ट ट्रयाक, वाटर सावर टेस्ट बुुथ र फाइनल इन्स्पेक्सन जस्ता एसेम्बली फ्यासिलिटी रहेको छ ।

त्यसैगरी ट्रेनिङ रुम तथा कारको क्वालिटी इन्स्पेक्सनका लागि अडिट रुम पनि रहेको छ । प्रत्येक सवारी साधन उत्पादन भए पछि यसको गुुणस्तरको वारेमा जाँच गरी प्रत्येक १० मध्ये १ कारको रिपोर्ट हुुन्डाईको मुख्य कार्यालयमा पठाउनु पर्ने अनिवार्यता रहेको कम्पनीको भनाइ छ ।

यसका साथै प्लान्ट भित्र बीआईपी पार्ट्स र सीकेडी पार्ट्सका लागि वेयरहाउस एवम् क्यान्टिन, युटिलिटी ब्लक र अटो कम्पाउन्ड समेत रहेका छन् ।

भविष्यमा नेपालमा समेत तेस्रो चरणको कार्य अर्थात पेन्ट सप समेत गरिने लक्ष्मी मोटर्सको भनाइ छ । यसमा सवारी साधनको पेन्टिङ सम्बन्धी आवश्यक कार्य गरिन्छ ।

यसकारण मेड इन नेपाल
विश्वका धेरै देशमा हुन्डाईका यस्तै एसेम्बली प्लान्ट छन् । सवारी साधन उत्पादनमा हुने पाँच चरण मध्ये कुनैमा कुनै र कुनैमा कुनै चरण रहेको हुन्छ । नेपालमा पनि हाल पछिल्लो दुुई चरणको कार्य भइरहेको छ ।

विश्वमा सबै स्थानमा रहेका प्लान्टमा यही प्रक्रिया अनुसार नै सवारी साधन उत्पादन हुन्छ । यसका लागि हुन्डाईले निश्चित प्रक्रियाको लागि आवश्यक नियम बनाएको हुन्छ र त्यसको पालना गर्नुपर्छ । नेपालमा पनि त्यही प्रक्रिया अनुसार नै सवारी साधन उत्पादन हुने नियम रहेको छ र त्यसै अनुसार पहिलो चरणमा हुुन्डाई भेन्यु उत्पादन गरिएको हो ।

नेपालमै एसेम्बल गरेर उत्पादन गरिएकाले यसलाई कम्पनीले ‘मेड इन नेपाल हुन्डाई भेन्यु’ भनेको छ ।

फाइदा के ?
एसेम्बल गरिए पनि नेपालमै उत्पादन भएको भन्न मिल्ने र यहाँ रोजगार समेत धेरैले पाउन सकिने सम्भावना हुन्छ । हुन्डाईको सो प्लान्टमा पहिलो चरणमा २ सय र दोस्रो चरणमा ५ सय जनाले काम पाउन सकिने बताइएको छ । त्यसैले नेपाली जनशक्तिले रोजगारी पाउन सक्ने सम्भावना हुन्छ ।

त्यसैगरी नेपाल भित्रिने सवारी साधनको तुलनामा पार्ट्समा सरकारले नै धेरै सहुलियत प्रदान गरेको छ । सरकाले यो अवस्थामा भन्सारमा २५ प्रतिशत र अन्तःशुल्कमा ५० प्रतिशत छुटको साथै आयकर लगायत छुट र अन्य सुबिधा दिँदै आएको छ । यसले गर्दा व्यवसायीहरुलाई समेत सस्तो दरमा आवश्यक सामग्री झिकाउन सकिने सम्भावना हुन्छ र अन्ततोगत्वा यसको लागतमा कमी भएर उपभोक्तालाई पनि फाइदा हुन्छ ।

मूल्यमा कति फरक ?
नेपालमै एसेम्बल हुने भए पछि यहाँबाट उत्पादित सवारी साधनको मूल्यमा पनि केही फरक हुने आशा गर्न सकिन्छ । हाल नेपाली बजारमा उपलब्ध हुन्डाई भेन्युको बेस मोडलको मूल्य ४० लाख ९६ हजार रुपैयाँ छ ।

के अब मेड इन नेपाल हुन्डाई भेन्युको मूल्य पनि घट्ला त ? लक्ष्मी मोटर कर्पोरेसनले हाल सम्म यसको वारेमा औपचारिक जानकारी सार्वजनिक गरेको छैन । सम्भवतः करिव एक साता पछि मात्र यसको वारेमा जानकारी उपलब्ध हुने अनुमान गरिएको छ । आशा गरौ, मूल्यमा पनि केही कमी अवश्य आउने छ ।