नाडा अटो शो २०२४ को फरक आकर्षण : विभिन्न ब्रान्डका लुब्रिकेन्ट्स, ब्याट्री र अन्य कम्पोनेन्टका स्टल

काठमाडौं – राजधानीको भृकुटीमण्डपमा जारी नाडा अटो शो २०२४ मा विभिन्न सवारी साधनमा प्रयोग हुने लुब्रिकेन्ट कम्पनीहरुले समेत स्टल राखेका छन् । सवारी साधनमा प्रयोग हुने पार्ट्सको कार्यलाई सहज बनाउनका लागि प्रयोग हुने यस्ता लुब्रिकेन्ट लगायतका पार्ट्स र कम्पोनेन्टका लागि एकै स्थानमा स्टलको व्यवस्था गरिएको छ । नेपालमै बनेका र विदेशी कम्पनीका गरी विभिन्न ब्रान्डका लुब्रिकेन्टले आफ्ना उत्पादनको वारेमा अवलोकनकर्तालाई जानकारी प्रदान गरिरहेका छन् ।

नेपाली बजारमा हालै उपलब्ध नेपाल गोल्ड र भिडोल लुब्रिकेन्टको स्टल त्यहाँ रहेको छ । युनाइटेड लुब्रिकेन्ट्स इन्डष्ट्रिजले उत्पादन गरेको यी दुई ब्रान्डका लुब्रिकेन्टको वारेमा अवलोकनकर्तालाई जानकारी प्रदान गर्नु नै मुख्य उद्देश्य रहेको कम्पनीको भनाइ छ ।

हालै नेपालमा उत्पादन प्रारम्भ भएको राइड तथा इनर्जी ब्याट्री समेत एसटीसी प्रालिले प्रदर्शनमा राखेको छ । नेपालमा उत्पादन हुने ब्याट्रीको वारेमा बुझ्न र अन्य जानकारी लिनका लागि यी स्टलको प्रयोग गर्न सकिन्छ ।

ग्लोब्याट ब्याट्री र पेट्रोनस लुब्रिकेन्टको कारोबार गर्दै आएको त्रिथुंगा ट्रेडिङ कन्सर्नले पुरानो ब्याट्री लिएर नयाँ ब्याट्री लिने ग्राहकलाई ५५ प्रतिशत सम्म छुटमा ब्याट्री उपलब्ध गराउने बताएको छ । त्यसैगरी पेट्रोनस लुब्रिकेन्टका सबै रेन्ज अवलोकनकर्ताका लागि उपलब्ध गराएको छ ।

लिङलङ र जेके टायर तथा गुडइयर लुब्रिकेन्ट बिक्री–वितरण गरिरहेको डेल्टा डिष्ट्रिब्युटर्सले नेपालमा उपलब्ध विभिन्न ब्रान्डका सवारी साधनका लागि आवश्यक टायर समेत उत्पादन गर्दै आएको छ । शेर्पा लगायतका ब्रान्डमा ग्रिन टायर उत्पादन गर्दै आएको कम्पनीले आफ्ना उत्पादन वारेमा जानकारी दिनुका साथै निश्चित छुटको समेत व्यवस्था गरेको बताएको छ ।

गल्फ लुब्रिकेन्टको उत्पादक तथा वितरक नेपाल ल्युब आयल लिमिटेडले क्लिक, सेयर एन्ड विन अफर लागू गरेको छ । यस अनुसार स्टलको फोटो खिचेर आफ्नो फेसबुकमा पोस्ट र सेयर गरेर धेरै लाइक आउने ग्राहकलाई आकर्षक पुरस्कारको व्यवस्था गरिएको छ । त्यसैगरी ‘टस द रिङ इन द बोटल’ खेल अन्तर्गत बोटलमा रिङ छिराउने अवलोकनकर्तालाई गल्फको टिसर्ट पुरस्कार दिने व्यवस्था छ ।

१२५ वर्ष पुरानो कम्पनीको रुपमा जानकारी प्रदान गर्दै आएको डकह्याम्स लुब्रिकेन्टको स्टलमा पनि सबै रेन्जका लुब्रिकेन्ट राखिएका छन् । लुब्रिकेन्ट र यसको प्रयोगको वारेमा जानकारी प्रदान गर्नु अटो शोको मुख्य उद्देश्य रहेको कम्पनीको भनाइ छ ।

स्टिलबर्डका उत्पादन उपलब्ध गराउदै आएको युनिपेट्रो इनर्जीले रबर पार्ट्स र फिल्टर लगायतका उत्पादनको प्रदर्शन गर्नुका साथै आवश्यक जानकारी प्रदान गर्दै आएको छ । टु ह्विलरका लागि आवश्यक सबै रेन्ज उपलब्ध गराएको बताउने युनिपेट्रोले आगामी दिनमा अझै बढी उत्पादन उपलब्ध गराउने बताएको छ ।

आयल ल्युब सिस्टम अर्थात ओएलएसका वर्कशप इक्विपमेन्ट र टुल्स उपलब्ध गराउदै आएको पञ्चकन्या मार्केटिङले ती उपकरण प्रदर्शन गरेको छ । अटो शोकै अवसरमा औपचारिक रुपमा ती उपकरण नेपाली बजारमा लन्च गरेको पञ्चकन्या मार्केटिङले अवलोकनकर्तालाई ती उपकरणका वारेमा जानकारी प्रदान गरिरहेको छ ।

नेपाली बजारमा लामो समय देखि एटीएस एल्गीका वर्कशप इक्विपमेन्ट उपलब्ध गराउदै आएको हिट्को प्रालिले ती इक्विपमेन्टका साथै फायर एक्सटिंग्विसर र अन्य विभिन्न इक्विपमेन्टको वारेमा समेत जानकारी प्रदान गरिरहेको छ । हिट्को नाडा अटो शो २०२४ को फायर सेफ्टी सपोर्टर समेत हो ।

यी वाहेक अन्य प्रशस्तै ब्रान्डका पार्ट्स लगायतका उपकरण प्रदर्शनी स्थलमा रहेका छन् ।