नानो भन्दा सानो कार ‘माइली’ आउँदै

फ्रान्सेली अटोमोबाइल कम्पनी लिगियरद्वारा डिजाइन गरेको माइली इलेक्ट्रिक कार भारतमा प्रवेशको लागि तयारी गरिरहेको छ । यो कार भारतमा ३ भेरिएन्टमा लन्च गर्न सक्नेछ । यो कार युरोपेली बजारमा भने लन्च भइसकेको छ ।

कम्पनीले भारतमा यो कारको रोड टेस्ट सुरु गरिसकेको छ । यो इलेक्ट्रिक कार चाँडै नै भारतमा लन्च हुने खबर सार्वजनिक भएको छ । सो कार अटो एक्स्पो २०२४ मा सार्वजनिक गर्ने सम्भावना छ र त्यही बेला यसको बुकिङ पनि सुरु गर्न सकिनेछ । यद्यपि कम्पनीले हाल यस सम्बन्धमा कुनै आधिकारिक जानकारी दिएको छैन ।

माइली इलेक्ट्रिक कार एउटा कम्प्याक्ट कार हो, जसमा २ वटा ढोका दिइएको छ । कारका ४ भेरिएन्ट गुड, आइडियल, एपिक र रिवेल युरोपेली बजारमा उपलब्ध छ । यो कार टाटाको नानो भन्दा पनि सानो छ ।

कारको लम्बाई २९६० एमएम छ । यसको ह्विलबेस पनि निकै छोटो छ । सो कार ३ ब्याट्री विकल्पमा उपलब्ध छ । यसमा ४.१४ किलोवाट, ८.२८ किलोवाट र १२.४२ किलोवाटको ब्याट्री प्याक दिइएको छ । जसमा कारको रेन्ज ६३ किमी, १२३ किमी र १९२ किमीसम्म रहेको छ ।

कारमा नेभिगेसनका साथसाथै क्लाइमेट कन्ट्रोल एसी, भेन्टिलेटेड सिट, ८ इन्चको इन्फोटेनमेन्ट सिस्टम, डिजिटल इन्स्ट्रयुमेन्ट क्लस्टर, कीलेस इन्ट्री र क्रयास गार्ड जस्ता फिचर उपलब्ध छ । साथै स्टेयरिङ कन्ट्रोल, एबीएस, ईबीडी, लेन कन्ट्रोल सिस्टम, ड्युअल एयरब्यागजस्ता सेफ्टी फिचर उपलब्ध छ ।

कम्पनीले यसको मूल्यको बारेमा कुनै जानकारी दिएको छैन । तर रिपोर्टका अनुसार यो कार ५ लाख भारु भन्दा कम मूल्यमा लन्च गर्न सक्नेछ । सो कारको मूल्य र फिचरले कमेट र टाटा टियागो जस्ता इलेक्ट्रिक कारलाई कडा प्रतिस्पर्धा दिनेछ ।