यातायातको डेटा सेन्टरमा समस्या, नयाँ लाइसेन्स आवेदन फेरि रोकियो

काठमाडौं– यातायात व्यवस्था विभागको डेटा सेन्टरमा पुनः समस्या उत्पन्न भएपछि नयाँ लाइसेन्सका लागि आवेदन दिने प्रक्रिया फेरि बन्द भएको छ । १६ कात्तिकदेखि आंशिक रूपमा सञ्चालनमा आएको प्रणाली आजदेखि अर्को सूचना जारी नभएसम्म पूर्ण रूपमा रोकिएको विभागले जनाएको छ ।

इलेक्ट्रोनिक ड्राइविङ लाइसेन्स तथा नयाँ लाइसेन्स आवेदन प्रणाली नियमित रूपमा सञ्चालनमा आउँदै गर्दा फेरि समस्या देखिएपछि सेवाग्राहीहरू प्रभावित बनेका छन् । विभागका अनुसार प्रणालीमा उत्पन्न प्राविधिक त्रुटिका कारण आवेदन दर्ता, डेटा अभिलेख, अनलाइन भेरिफिकेशन लगायतका सेवा अवरुद्ध भएका छन् ।

यातायात व्यवस्था विभागले २३ र २४ भदौमा भएको आन्दोलनका क्रममा आफ्नो केन्द्रीय प्रणालीमा ठूलो क्षति पुगेको जनाएको थियो । त्यसपछि लामो समयसम्म अवरुद्ध सेवा १६ कात्तिकबाट आंशिक रूपमा सुचारु गरिएको थियो ।

तर, डेटा सेन्टरमा फेरि समस्या देखिएपछि लाइसेन्ससम्बन्धी सम्पूर्ण प्रक्रिया पुनः रोकिएको छ ।