८०० किलोमिटर रेन्ज दिने लेक्ससको नयाँ ईभी आउँदै

जापनिज लक्जरी ब्रान्ड लेक्ससले निकट भविष्यमा आउने आफ्नो इलेक्ट्रिक कारको टिजर वाहिर ल्याएको छ । आगामी महिना जापानमा हुने टोकियो अटो शोमा कन्सेप्ट सार्वजनिक गर्ने तयारी स्वरुप कम्पनीले पहिलोपटक टिजर सार्वजनिक गरेको हो ।

यो नयाँ कन्सेप्टले इलेक्ट्रिक कारको उत्पादन विधिमा आमूल परिवर्तन र सफ्टवेयर प्लेटफर्मलाई पूर्ण रूपमा सुधार गर्ने कम्पनीले जनाएको छ । सन् २०३५ सम्ममा आफ्नो सम्पूर्ण लाइन–अपलाई विद्युतीकरण गर्ने योजनाको पहिलो चरणमा कम्पनीले ईभीको कन्सेप्ट सार्वजनिक गर्न लागेको हो । अन्य लक्जरी ब्रान्ड विएमडब्लु र मर्सिडिज बेन्जले नयाँ कन्सेप्ट सार्वजनिक गरेपछि लेक्ससले पनि यस्तो घोषणा गरेको हो ।

लेक्ससले ल्याउन लागेको नयाँ इलेक्ट्रिक कारले सिंगल चार्जमा ८०० किलोमिटर रेन्ज दिने दावी गरिएको छ । यसमा टोयोटाको नयाँ लिथियम आयोन ब्याट्री टेक्नोलोजी प्रयोग हुनेछ । जुन प्रविधीमा टोयोटाले अहिले धमाधम काम गरिरहेको छ भने निकट भविष्यमा इलेक्ट्रिक लाइन–अप विस्तार गर्ने तयारी तिब्र बनाइरहेको छ ।

कन्सेप्टको टिजरमात्र सार्वजनिक गरिएका कारण लेक्ससको इलेक्ट्रिक कार तत्कालै बजारमा भने उपलब्ध हुनेछैन । यो नयाँ कार आउन कम्तिमा पनि ३ वर्ष लाग्ने कम्पनीले जनाएको छ । उच्च पर्फमेन्सयुक्त विशेषता हुने सो नयाँ कारले बिएमडब्लु आई४ र हुन्डाई आयोनिक ६ लगायत कारसंग प्रतिस्पर्धा गर्ने अनुमान गरिएको छ ।