ल्यान्डक्रुजर गाडी पाउने लोभमा झुक्किदै नेपाली, लबिम मलको नक्कली फेसबुक पेजमा यस्तो आतंक

काठमाडौँ – ललितपुरको लबिम मलको नाममा खोलिएको नक्कली फेसबुक एकाउन्टबाट एउटा पोस्ट गर्दै ल्यान्डक्रुजर गाडी पाइने लोभ देखाएर सर्वसाधारणलाई ठग्ने प्रयास गरेको पाइएको छ । क्रिसमसको अवसर पारेर फेसबुकमा नक्कली सूचना फैलाउँदै सर्वसाधारणलाई यसरी ठग्ने प्रयास भइरहेको पाइएको हो । ल्यान्डक्रुजर गाडी उपहार पाइने लोभ देखाएर स्क्यामरले फेसबुकमा ‘फिसिङ’ र ‘मालवेयर’ युक्त लिङ्क फैलाइरहेका छन् ।

उपहारको लोभमा परेर लाखौँ नेपाली प्रयोगकर्ताले उक्त नक्कली पोस्टमा कमेन्ट र शेयर गरेका छन् । विशेषगरी फेसबुकको ‘हाइलाइट्स’ मेन्सन फिचरको दुरुपयोग गरिएका कारण यो भ्रमपूर्ण पोस्ट छोटो समयमै व्यापक रूपमा फैलिएको पाइएको हो ।

लबिम मलको नाममा खोलिएको नक्कली पेजबाट एउटा पोस्ट गर्दै सहभागी हुनेलाई महँगो ल्यान्डक्रुजर गाडी दिने दाबी गरिएको थियो । लबिम मल प्रशासनले क्रिसमस लक्षित यस्तो कुनै पनि उपहार योजना सार्वजनिक नगरेको स्पष्ट पारेको छ ।

यसप्रकारका भ्रमपूर्ण सामग्रीबाट सर्वसाधारणलाई पेजहरुमा लाइक, कमेन्ट आदि गर्न अनुरोध गर्ने र झुक्याउने गरेको पाइन्छ । साइबर सुरक्षा विश्लेषकले यस्ता शंकास्पद लिङ्कमा क्लिक नगर्न चेतावनी दिएका छन् । यस्ता लिङ्कबाट झुक्किएर कुनै फाइल डाउनलोड हुन पुगेमा प्रयोगकर्ताको मोबाइल वा कम्प्युटरमा मालवेयर छिर्न सक्ने र त्यसले बैंक खाता, पासवर्ड लगायतका व्यक्तिगत र संवेदनशील विवरणहरू चोरी गर्ने उच्च जोखिम रहन्छ ।