केटीएम ट्रयाक टेष्ट एक्सपिरियन्स सम्पन्न

काठमाडौं– केटीएम नेपालले आयोजना गरेको ट्रायक टेष्ट एक्सपिरियन्स कार्यक्रम शनिबार सम्पन्न भएको छ । शुक्रबार र शनिबार दुई दिनका लागि आयोजना गरिएको कार्यक्रममा उल्लेख्य राइडरले सहभागिता जनाएको कम्पनीले जनाएको छ ।

कम्पनीका अनुसार मोटरसाइकल प्रेमीहरूले केटिएमका विभिन्न मोडेलहरूलाई टेष्ट राइड गर्ने अवसर पाएका थिए भने ‘हट ल्याप च्यालेन्ज’ मा सहभागिता जनाएका थिए ।

कार्यक्रमको पहिलो दिन टेष्ट राइड एक्सपीरियन्समा सहभागीहरूले केटीएम २०० ड्युक, २५० ड्युक, २०० आरसी र ३९० ड्युक मोडेललाई विशेष रूपमा डिजाइन गरिएकोे ट्रयाकमा टेस्ट राइड गरेका थिए । उनीहरुका लागि विज्ञ राइडरहरूले प्रशिक्षण सत्र समेत सञ्चालन गरेका थिए ।

यसैगरी कार्यक्रमको दोस्रो दिन हट ल्याप च्यालेन्ज आयोजना गरिएको र उक्त प्रतियोगिता तीन समूहमा विभाजन गरिएको थियो । प्रोरेसर, अमेच्योर,र महिला श्रेणीमा बिभाजन गरिएको उक्त प्रतियोगितामा सबैभन्दा छिटो समय निकाल्ने प्रतिस्पर्धीलाई बिजेता घोषणा गरिएको थियो ।