केटीएम अरेन्ज ब्लड राइड २०२५ सम्पन्न : १५० राइडर पुगे एउटै ऐतिहासिक गन्तव्यमा

काठमाडौं – १५० जोशिला राइडर सहितको केटीएम अरेन्ज ब्लड राइड समापन भएको छ । शनिबार धुलिखेलको हिमालयन होराइजन होटलमा पुगेर यात्रा समापन भएको सो राइड अन्तर्गत सहभागीहरुले विभिन्न सडक र ट्रेलहरु पार गरेका थिए । नेपालका लागि केटीएमको आधिकारिक वितरक हंसराज हुलासचन्द एन्ड कम्पनीको आयोजनामा सो राइड कार्यक्रम सम्पन्न भएको थियो ।

स्ट्रोङगर टुगेदर, फास्टर फरवार्ड नामक साहसी नारामुनि आयोजित यो वार्षिक उत्सवले साहस, भ्रातृत्व र एड्रिनालिनको आत्मालाई फेरि एक पटक उजागर गरेको र केटीएमलाई नेपालमा मोटरसाइक्लिङको प्रतीकको रूपमा पुनः स्थापित गरेको बताइएको छ ।

देशभरबाट आएका राइडरहरू बिहान सबेरै विभिन्न बिन्दुहरूमा एकत्रित हुँदै धुलिखेलको मनमोहक प्रकृतितर्फ रोमाञ्चक यात्रामा निस्किएका थिए। उपत्यकाको माथिल्लो भागमा अवस्थित हिमालयन होराइजन होटल उनीहरूका लागि ऊर्जा, धैर्य र मित्रताको पुरस्कारस्वरूप उभिएको भनाइ छ ।

कार्यक्रम केवल यात्रासम्म सीमित रहेन। गन्तव्यमा पुगेपछि सहभागीहरूलाई रमाइला गतिविधि, उपहारहरू र स्वादिलो नास्ताले स्वागत गरियो, जसले अद्भुत यात्रालाई उत्कृष्ट रूपमा समापन गर्‍यो। १५० राइडर्स, वान प्यासन, वान लिजेन्ड्री जर्नी भन्ने नाराले सार्थकता पायो, जब राइडरहरूले साहसिकताको साझा प्रेमलाई मनाउँदै, अनुभवहरू साट्दै र केटीएम समुदायको सम्बन्धलाई अझ बलियो बनाए।

अरेन्ज ब्लड राइडले रोमाञ्चकता र सुरक्षाको सन्तुलन राख्दै, साहसिकता र समुदाय भावना एकसाथ जोड्दै नेपालमा राइडर केन्द्रित कार्यक्रमहरूको लागि नयाँ मानक स्थापना गर्दै आएको छ। सहभागीहरूले कार्यक्रमको उत्कृष्ट व्यवस्थापन, उत्साहपूर्ण वातावरण र अन्य केटीएम उत्साहीहरूसँग सँगै यात्रा गर्न पाएको अवसरको प्रशंसा गरेका थिए ।

प्रेसिजन इन्जिनियरिङ र अतुलनीय प्रदर्शनको समृद्ध विरासत बोकेको केटीएम नेपाल, एड्भेन्चर मोटरसाइक्लिङ क्षेत्रमा अग्रणी ब्रान्ड भएको कम्पनीको दावी छ । कम्पनीले भनेको छ – बाइकको बिक्री मात्र नभई, केटीएमले साहसी अन्वेषण र समुदायको संस्कृतिलाई अभिप्रेरणा दिँदै राइडरहरूलाई बाटोमै होइन, जीवनका हरेक क्षेत्रमा सीमाना चिर्न प्रेरित गर्छ।