काइनेटिक लुना अब नयाँ टेक्नोलोजी र फिचरसहित इलेक्ट्रिक भर्सनमा आउने

कुनै समयमा निकै नै लोकप्रिय मोपेड काइनेटिक लुना नयाँ टेक्नोलोजी र फिचरसहित पुनरागमन हुने भएको छ । तर अब यो इलेक्ट्रिक भर्सनमा आउने भएको छ । काइनेटिक ग्रीनका संस्थापक तथा सीईओ सुलभा फिरोदिया मोटवानीले ‘ई–लुना’ नामक नयाँ विद्युतीय दुई पाङ्ग्रे सवारीसाधन लन्च गर्न लागेको पुष्टि गरेकी छिन् ।

लुना मोपेड लगभग ५० वर्ष पहिले काइनेटिक इन्जिनियरिङद्वारा भारतीय बजारमा लन्च गरिएको थियो । सस्तो मूल्य र सुविधाका कारण लुना निकै लोकप्रिय भएको थियो । यो साइकल जस्तै प्याडल भएको ५० सीसी मोपेड थियो ।

नयाँ काइनेटिक लुना इलेक्ट्रिक मोपेडमा १ किलोवाट पावर जेनेरेट गर्न लिथियम आयोन ब्याट्री प्याक जडान गरिनेछ, जसले सिंगल चार्जमा ७० देखि ८० किलोमिटरको रेन्ज प्रदान गर्ने सम्भावना रहेको छ । यसको टप स्पिड २५ किलोमिटर प्रतिघन्टा हुनेछ ।

काइनेटिक ग्रीन इनर्जी एन्ड पावर सोलुसन्स काइनेटिक ग्रुपको सहायक कम्पनी हो । रिपोर्टका अनुसार कम्पनीले च्यासिसको उत्पादन सुरु गरिसकेको छ । साथै कम्पनीले आगामी विद्युतीय लुनाका लागि छुट्टै प्रोडक्ट लाइन पनि स्थापना गरिरहेको छ । कम्पनीले एसेम्बली लाइनमा ३० वटा नयाँ वेल्डिङ मेसिन जडान गरिसकेको छ ।

नयाँ मोपेडमा इलेक्ट्रिक सेल्फ स्टार्ट, एलईडी हेडलाइट, डीआरएल, डिजिटल इन्स्ट्रयुमेन्ट कन्सोल र यूएसबी चार्जरका साथै अन्य धेरै विशेष फिचर दिइएको छ । यसको मूल्य ५० हजार भारुसम्ममा हुने जानकारी दिइएको छ । काइनेटिकले यसलाई २०२४ मा लन्च गर्ने सम्भावना छ ।