२०२५ मोडल किया सेल्टोसको केही दिन पछि नेपालमा बिक्री सुरु हुने, यस्तो हुनेछ मूल्य र फिचर

कठमाडौं – कियाको नेपालका लागि आधिकारिक वितरक कन्टिनेन्टल ट्रेडिङ इन्टरप्राइजेजले २०२५ मोडलको किया सेल्टोस नेपाली बजारमा उपलब्ध गराउने भएको छ । किया सेल्टोस एचटीके भेरिएन्ट नेपाली बजारमा उपलब्ध हुने भएको छ ।

कम्पनी स्रोतका अनुसार अबको करिव दुई साता पहिले नै यो गाडी नेपाली बजारमा उपलब्ध हुनेछ । यसको मूल्य ५७ लाख ९० हजार रुपैयाँ तोकिएको छ ।

१.५ लिटर पेट्रोल इन्जिनयुक्त सो एसयूभीमा ६ एयरब्याग, पुस स्टार्ट बटन, स्टेयरिङ माउन्टेड कन्ट्रोल, ८.२५ इन्चको टचस्क्रिन इन्फोटेनमेन्ट सिस्टम, एन्ड्रोइड अटो र एप्पल कारप्ले, ६०ः४० स्प्लिट सिट र १९२ एमएमको ग्राउन्ड क्लियरेन्स लगायतका फिचर उपलब्ध छन् ।

किया सेल्टोस पेट्रोल र डिजेल इन्जिन गरी धेरै भेरिएन्टमा उपलब्ध छ । ती मध्ये धेरैको रोजाइमा पर्न सक्ने एचटीके भेरिएन्ट नेपालमा उपलब्ध हुने भएको हो । नेपालका लागि सो गाडी बुकिङ र बिक्री प्रारम्भ हुने क्रममा रहेको र यसका लागि आवश्यक तयारी भइरहेको बताइएको छ ।

किया सेल्टोस नेपालमा समेत निकै रुचाइएको मोडल हो । यो भन्दा पहिले २०७६ सालमा समेत नेपाल भित्रिदा यसको चर्चा निकै नै चुलिएको थियो । नेपाली सडकमा प्रशस्तै किया सेल्टोस एसयूभी गुडिरहेका छन् । अबको नयाँ मोडलले समेत चर्चा पाउने अनुमान गर्न सकिन्छ ।

पहिले देखि नै उपलब्ध मोडलमा केही फिचर थप गरेर कियाले करिव दुई महिना पहिले २०२५ मोडल भारतमा लन्च गरेको थियो । छोटो समयमै यो मोडल नेपालमा समेत उपलब्ध हुने भएको हो ।