यस्तो हुनेछ किया ईभी–५, रेन्ज ७२० किलोमिटर सम्म

किया मोटर्सले छिट्टै बजारमा ल्याउने अनुमान गरेको ईभी–५ बारे विभिन्न विवरणहरु बाहिर आएको छ । सार्बजनिक भएको विवरण अनुसार सो इलेक्ट्रिक एसयूभी ई–जीएमपी प्लेटफर्मममा निर्माण हुनेछ । जसको लुक्स र डिजाइन किया–९ बाट प्रेरित हुनेछ ।

बक्सी डिजाइनमा आउने सो एसयूभीको पछाडी सिटलाइ परै फोल्ड गरेर बेडको रुपमा प्रयोग गर्न सकिन्छ । साथै यसमा ४.१ लीटर क्षमताको रेफ्रिजेरेटर, १२.३ इन्चको टचस्क्रिन इन्फोटेन्मेन्ट सिस्टम र ५ इन्चको क्लाइमेट कन्ट्रोल डिस्प्ले उपलब्ध हुनेछ ।

सो एसयूभी स्ट्यान्डर्ड, लङ रेन्ज र लङ रेन्ज अल ह्विल ड्राइभ गरी कुल तीन भेरिएन्टमा उपलब्ध हुने जनाइएको छ । जसमध्ये बेस भेरिएन्टमा ६४ किलोवाट आवरको ब्याट्री जडान गरिनेछ भने २१५ बीएचपी क्षमताको इलेक्ट्रिक मोटर हुनेछ । यो भेरिएन्टले सिंगल चार्जमा ५३० किलोमिटर रेन्ज दिने दावी छ ।

यसैगरी, लङ रेन्जमा पनि २१५ बीएचपी क्षमताकै मोटर जडान गरिने भएपनि ब्याट्री भने ८८ किलोवाट अवारको हुनेछ । यो भेरिएन्टले सिंगल चार्जमा ७२० किलोमिटर रेन्ज दिने दावी गरिएको छ । अर्को अल ह्विल ड्राइभ भेरिएन्टमा भने दुईवटा इलेक्ट्रिक मोटर उपलब्ध हुनेछ । पावरको मामतलमा एकदमै शक्तिशाली हुने यो भेरिएन्टले सिंगल चार्जमा ६५० किलोमिटर रेन्ज दिने बताइएको छ ।